Тошкент шаҳар ИИББ Жаҳонгир Отажоновнинг ИИВ ходимлари ҳақидаги видеомурожаатига муносабат билдирди

Хонанда Жаҳонгир Отажоновнинг ички ишлар ходимлари ҳақида видеомурожаати ижтимоий тармоқларда тарқалди. Унда Отажонов машинасини жарима майдонидан ололмаётганини айтган ва орган ходимларига ўз муносабатини билдирган. Тошкент шаҳар ИИББ унинг чиқишида туҳмат ва ҳақорат қилиш аломатлари мавжудлиги сабабли ҳолатга тегишли тартибда ҳуқуқий баҳо берилишини билдирди.

Маълум қилинишича, 17 июнь куни Тошкент шаҳар ИИББ Йўл ҳаракати хавфсизлиги хизмати инспектори Мирзо Улуғбек тумани, Олтинтепа кўчасида ҳаракатланиб келаётган Gentra’ни тўхтатган. Текширув давомида машинани Жаҳонгир Отажоновнинг укаси — Алишер Отажонов бошқарув ҳуқуқини берувчи ҳужжатларсиз ҳайдаб кетаётгани аниқланган. Шу сабабли Gentra жарима майдонига жойлаштирилган ва айни вақтга қадар тегишли ҳужжатлар тақдим этилмаётганлиги сабабли вақтинча сақланмоқда.

Пойтахт ИИББнинг қайд этишича, ҳозирда Жаҳонгир Отажонов ўзининг давлат органлари хизматчиларига нисбатан ҳақоратомуз видеочиқишлари орқали яқинларининг ҳуқуқбузарликларини яшириш, ўзининг маиший муаммоларига омма эътиборини тортишга уринишлари намоён бўлмоқда.

«Мазкур фуқаронинг ҳаракатларида туҳмат ва ҳақорат қилиш аломатлари мавжуд бўлганлиги сабабли ҳолатга тегишли тартибда ҳуқуқий баҳо берилади ва жамоатчиликка қўшимча равишда ахборот тақдим этилади», — дейилади хабарда.

Маълумот учун, Маъмурий жавобгарлик тўғрисидаги кодекснинг 41-моддасига кўра, ҳақорат қилиш, яъни шахснинг шаъни ва қадр-қимматини қасддан камситиш БҲМнинг 20 бараваридан 40 бараваригача (4,9 миллион сўмдан 9,8 миллион сўмгача) миқдорда жарима солишга асос бўлади.

Жиноят кодексининг 140-моддасига кўра эса, ҳақорат қилиш, яъни шахснинг шаъни ва қадр-қимматини беодоблик билан қасддан таҳқирлаш, башарти шундай ҳаракатлар учун маъмурий жазо қўлланилгандан кейин содир этилган бўлса, БҲМнинг 200 бараваригача миқдорда жарима ёки 1 йилгача ахлоқ тузатиш ишлари билан жазоланади.

Эслатиб ўтамиз, Жаҳонгир Отажонов 2020 йилнинг декабрида санъатни тарк этганини маълум қилганди. 2021 йилнинг январида навбатдаги президентлик сайловида ўз номзодини қўйишини маълум қилиб, «Халқ манфаатлари» деб номланган янги сиёсий партия тузиш ҳаракатига тушди ва Ўзбекистонни ҳар бир масалада Ўрта Осиёдаги энг зўр давлат қилиш нияти борлигини айтганди.

Унинг бу қарорига ижтимоий тармоқлар фойдаланувчилари турлича муносабат билдирди. Кимдир ундан сиёсатчи чиқмаслигини айтиб, уни бу фикридан қайтаришга уринди, яна кимдир уни қўллаб-қувватлади. Изоҳлар орасида хонанданинг шаънига ҳақоратли сўзлар ёзиб қолдирилган ҳолатлар ҳам учради.

Кейинчалик Жаҳонгир Отажонов сайловда қатнашиш истагидан қайтганини ва партия аъзолигидан чиққанини маълум қилди.