Buxoroda talabaning o‘qishini sirtqi bo‘limga ko‘chirib berish uchun 500 dollar so‘ragan dekan o‘rinbosari qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departament hamda DXXning Buxoro shahar bo‘limlari tomonidan tezkor tadbir o‘tkazilgan. Tadbir davomida Buxoro muhandislik-texnologiya instituti fakultet dekani o‘rinbosari institutning 1-bosqich talabasi X.ning ishonchiga kirib, o‘zining vakolatli tanishlari orqali uning o‘qishini kunduzgi bo‘limdan sirtqi bo‘limga ko‘chirib berishni va’da qilgani aniqlangan.
Buning evaziga u 500 AQSh dollari talab qilgan va oldindan 300 dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda Toshkent tibbiyot akademiyasiga 7 ming dollarga o‘qishga kiritib qo‘ymoqchi bo‘lgan xususiy o‘quv markazi rahbari ushlangani, Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs qo‘lga olingani, Qoraqalpoq davlat universitetiga o‘qishga kiritib qo‘yish uchun 25 mln so‘m talab qilgan assistent ushlangani to‘g‘risida xabar berilgandi.
Izoh (0)