Бухорода талабанинг ўқишини сиртқи бўлимга кўчириб бериш учун 500 доллар сўраган декан ўринбосари қўлга олинди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департамент ҳамда ДХХнинг Бухоро шаҳар бўлимлари томонидан тезкор тадбир ўтказилган. Тадбир давомида Бухоро муҳандислик-технология институти факультет декани ўринбосари институтнинг 1-босқич талабаси Х.нинг ишончига кириб, ўзининг ваколатли танишлари орқали унинг ўқишини кундузги бўлимдан сиртқи бўлимга кўчириб беришни ваъда қилгани аниқланган.
Бунинг эвазига у 500 АҚШ доллари талаб қилган ва олдиндан 300 долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда Тошкент тиббиёт академиясига 7 минг долларга ўқишга киритиб қўймоқчи бўлган хусусий ўқув маркази раҳбари ушлангани, Чирчиқ давлат педагогика институтига ўқишга киритиб қўйиш учун икки кишидан 9 минг доллар олган яна бир шахс қўлга олингани, Қорақалпоқ давлат университетига ўқишга киритиб қўйиш учун 25 млн сўм талаб қилган ассистент ушлангани тўғрисида хабар берилганди.
Изоҳ (0)