“Boshingiz omon bo‘lsin”. Sirdaryo viloyati hokimi G‘ofurjon Mirzayev jurnalistlarga do‘ppi sovg‘a qildi

27-iyun – Matbuot va ommaviy axborot vositalari xodimlari kuni kasb bayramini Sirdaryo viloyatida faoliyat yuritayotgan matbuot va ommaviy axborot vositalari xodimlari, jurnalistlar va blogerlar o‘zbek milliy do‘ppisida nishonladi. Bu haqda “Sirdaryo xabarlari” nashri xabar berdi.

Ma’lum qilinishicha, Sirdaryo viloyati hokimi G‘ofurjon Mirzayevning tashabbusi bilan tadbirga taklif etilganlarga o‘zbek milliy bosh kiyimi – do‘ppi sovg‘a qilingan. Viloyat hokimligining qabullar uyida boshlangan tadbirning birinchi qismida G‘ofurjon Mirzayev sirdaryolik matbuot va ommaviy axborot vositalari xodimlari hamda blogerlarni bayram bilan samimiy muborakbod etgan.

“Bayram avvalida milliy bosh kiyimining sovg‘a qilinishida ham ramziy ma’no bor. Zero, boshingiz omon bo‘lsin. Milliy urf-odat va an’analarimiz va libosimiz bilan faxrlanib, g‘ururga to‘lib, axborot makonida yurtimizning nomi va sha’nini doim yuqori ko‘tarib yuringlar, aziz jurnalistlar va blogerlar”, — deydi viloyati hokimi.

Bayram tadbirining ikkinchi qismi to‘kin dasturxon atrofida, bir piyola choy ustida davom etgan. Tadbirda, shuningdek, barcha tuman-shahar hokimliklarining axborot xizmatlari rahbarlariga zamonaviy noutbuklar sovg‘a qilingan.

Bundan tashqari, mehnat faoliyatida alohida yutuqlarga erishgan, mamlakatda amalga oshirilayotgan islohotlarni keng ommaga targ‘ib qilishda o‘zining munosib hissasini qo‘shib kelayotgan faol jurnalistlar va ommaviy axborot vositalarining bir guruhiga viloyat hokimining faxriy yorliq va qimmatbaho sovg‘alari topshirilgan.