27 июнь – Матбуот ва оммавий ахборот воситалари ходимлари куни касб байрамини Сирдарё вилоятида фаолият юритаётган матбуот ва оммавий ахборот воситалари ходимлари, журналистлар ва блогерлар ўзбек миллий дўпписида нишонлади. Бу ҳақда «Сирдарё хабарлари» нашри хабар берди.
Маълум қилинишича, Сирдарё вилояти ҳокими Ғофуржон Мирзаевнинг ташаббуси билан тадбирга таклиф этилганларга ўзбек миллий бош кийими – дўппи совға қилинган. Вилоят ҳокимлигининг қабуллар уйида бошланган тадбирнинг биринчи қисмида Ғофуржон Мирзаев сирдарёлик матбуот ва оммавий ахборот воситалари ходимлари ҳамда блогерларни байрам билан самимий муборакбод этган.
«Байрам аввалида миллий бош кийимининг совға қилинишида ҳам рамзий маъно бор. Зеро, бошингиз омон бўлсин. Миллий урф-одат ва анъаналаримиз ва либосимиз билан фахрланиб, ғурурга тўлиб, ахборот маконида юртимизнинг номи ва шаънини доим юқори кўтариб юринглар, азиз журналистлар ва блогерлар», — дейди вилояти ҳокими.
Байрам тадбирининг иккинчи қисми тўкин дастурхон атрофида, бир пиёла чой устида давом этган. Тадбирда, шунингдек, барча туман-шаҳар ҳокимликларининг ахборот хизматлари раҳбарларига замонавий ноутбуклар совға қилинган.
Бундан ташқари, меҳнат фаолиятида алоҳида ютуқларга эришган, мамлакатда амалга оширилаётган ислоҳотларни кенг оммага тарғиб қилишда ўзининг муносиб ҳиссасини қўшиб келаётган фаол журналистлар ва оммавий ахборот воситаларининг бир гуруҳига вилоят ҳокимининг фахрий ёрлиқ ва қимматбаҳо совғалари топширилган.
Изоҳ (0)