Shavkat Rahmonov UFC’da, Botir Ahmedov esa boksda navbatdagi g‘alabani qo‘lga kiritdi. Lomachenko va Jervonta Devis raqiblarini muddatidan avval mag‘lub etdi

Toshkent vaqti bilan 27-iyunga o‘tar kechasi va tongda boks hamda MMA bo‘yicha qator musobaqalar bo‘lib o‘tdi.

Ukrainalik bokschi Vasiliy Lomachenko (15-2, 11 KO) o‘zining navbatdagi jangini Toshkent vaqti bilan 27-iyun tongida yaponiyalik Masayoshi Nakataniga (19-2, 13 KO) qarshi o‘tkazdi.

Jang to‘liq Lomachenkoning ustunligida o‘tdi. Vasiliy 9-raundda ketma-ket o‘ta kuchli zarbalar yo‘llashi oqibatida referi jangni to‘xtatdi. Natijada Lomachenko texnik nokaut evaziga g‘alaba qozondi.

Yana bir boks kechasida ikkinchi yarimyengil vazn toifasida (-58,97 kg) WBA Super, yengil vazn toifasida (-61,23 kg) WBA Regular kamarlari sohibi Jervonta Devis (25-0, 24 KO) superyengil vazn toifasida (-63,5 kg) WBA Regular kamari sohibi Mario Barriosga (26-1, 17 KO) qarshi jang qildi.

Jangning dastlabki 5 raundi Barrios nazorati ostida o‘tdi. 6-raunddan boshlab Devis katta ustunlikka ega bo‘la boshladi. 8-raundda Jervonto Barriosni juda kuchli zarbalari orqali 2 marta nokdaun holatiga tushirdi. 11-raundda esa Barrios tanasiga qabul qilingan og‘ir zarbadan so‘ng yana bir bor nokdaunga tushdi. Shundan so‘ng yana o‘ziga keldi, biroq keyingi o‘tkazilgan zarbadan so‘ng referi jangni to‘xtatdi.

Shu tariqa Jervonto Devis faoliyatidagi 25-g‘alabasini qo‘lga kiritdi. Shuningdek, superyengil vazn toifasida (-63,5 kg) Barriosga tegishli bo‘lgan WBA Regular kamarini ham o‘ziniki qildi.

Ushbu boks kechasida O‘zbekistondan tug‘ilgan Botir Ahmedov (9-1, 8 KO) Arxenis Mendesni (25-7-3, 12 KO) mag‘lubiyatga uchratdi.

UFC Vegas 30 musobaqasining asosiy jangida o‘g‘ir vazn toifasi vakili Siril Gan rossiyalik yakkakurashchi Aleksandr Volkovdan ustun keldi. Ushbu musobaqa Prelim kardida O‘zbekistonda tug‘ilgan qozog‘istonlik yakkakurashchi Shavkat Rahmonov ham jang qildi. U braziliyalik Mishel Prazeresni ikkinchi raundda bo‘g‘ish usulini qo‘llab, taslim etdi.

Asosiy kard natijalari:

• Siril Gan (9-0) ochkolar hisobiga Aleksandr Volkovdan (33-9) ustun keldi — (50-45, 50-45, 49-46);
• Tanner Boser (20-8-1) 2-raunddagi texnik nokaut evaziga Ovins Sen-Pryuni (25-16) mag‘lub etdi;
• Timur Valiyev (18-2) ochkolar hisobiga Raoni Barselosni (16-2) yengdi — (28-28, 29-28, 29-28).
• Andre Fili (21-8) va Daniel Pineda (27-14) o‘rtasidagi jang natijasi Filining jarohati sabab hisobga olinmadi;
• Tim Mins (32-12-1) ochkolar hisobiga Nikolas Dalbini (19-4-1) mag‘lub etdi — (29-28, 29-28, 29-28);
• Renato Moykano (15-4-1) ikkinchi raundda bo‘g‘ish usulini qo‘llab, Jay Gerbertni (10-3) taslim etdi.