Шавкат Раҳмонов UFC’да, Ботир Аҳмедов эса боксда навбатдаги ғалабани қўлга киритди. Ломаченко ва Жервонта Дэвис рақибларини муддатидан аввал мағлуб этди

Тошкент вақти билан 27 июнга ўтар кечаси ва тонгда бокс ҳамда MMA бўйича қатор мусобақалар бўлиб ўтди.

Украиналик боксчи Василий Ломаченко (15-2, 11 КО) ўзининг навбатдаги жангини Тошкент вақти билан 27 июнь тонгида япониялик Масаёши Накатанига (19-2, 13 КО) қарши ўтказди.

Жанг тўлиқ Ломаченконинг устунлигида ўтди. Василий 9-раундда кетма-кет ўта кучли зарбалар йўллаши оқибатида рефери жангни тўхтатди. Натижада Ломаченко техник нокаут эвазига ғалаба қозонди.

Яна бир бокс кечасида иккинчи ярименгил вазн тоифасида (-58,97 кг) WBA Super, енгил вазн тоифасида (-61,23 кг) WBA Regular камарлари соҳиби Жервонта Дэвис (25-0, 24 КО) суперенгил вазн тоифасида (-63,5 кг) WBA Regular камари соҳиби Марио Барриосга (26-1, 17 КО) қарши жанг қилди.

Жангнинг дастлабки 5 раунди Барриос назорати остида ўтди. 6-раунддан бошлаб Дэвис катта устунликка эга бўла бошлади. 8-раундда Жервонто Барриосни жуда кучли зарбалари орқали 2 марта нокдаун ҳолатига туширди. 11-раундда эса Барриос танасига қабул қилинган оғир зарбадан сўнг яна бир бор нокдаунга тушди. Шундан сўнг яна ўзига келди, бироқ кейинги ўтказилган зарбадан сўнг рефери жангни тўхтатди.

Шу тариқа Жервонто Дэвис фаолиятидаги 25-ғалабасини қўлга киритди. Шунингдек, суперенгил вазн тоифасида (-63,5 кг) Барриосга тегишли бўлган WBA Regular камарини ҳам ўзиники қилди.

Ушбу бокс кечасида Ўзбекистондан туғилган Ботир Аҳмедов (9-1, 8 КО) Архенис Мендесни (25-7-3, 12 КО) мағлубиятга учратди.

UFC Vegas 30 мусобақасининг асосий жангида ўғир вазн тоифаси вакили Сирил Ган россиялик яккакурашчи Александр Волковдан устун келди. Ушбу мусобақа Прелим кардида Ўзбекистонда туғилган қозоғистонлик яккакурашчи Шавкат Раҳмонов ҳам жанг қилди. У бразилиялик Мишел Празересни иккинчи раундда бўғиш усулини қўллаб, таслим этди.

Асосий кард натижалари:

• Сирил Ган (9-0) очколар ҳисобига Александр Волковдан (33-9) устун келди — (50-45, 50-45, 49-46);
• Таннер Boseр (20-8-1) 2-раунддаги техник нокаут эвазига Овинс Сен-Прюни (25-16) мағлуб этди;
• Тимур Валиев (18-2) очколар ҳисобига Раони Барселосни (16-2) енгди — (28-28, 29-28, 29-28).
• Андре Фили (21-8) ва Даниэль Пинеда (27-14) ўртасидаги жанг натижаси Филининг жароҳати сабаб ҳисобга олинмади;
• Тим Минс (32-12-1) очколар ҳисобига Николас Далбини (19-4-1) мағлуб этди — (29-28, 29-28, 29-28);
• Ренато Мойкано (15-4-1) иккинчи раундда бўғиш усулини қўллаб, Жай Гербертни (10-3) таслим этди.