Amerikaning klassik maslkarlarini tubdan o‘zgartirish bilan tanilgan SpeedKore ustaxonasi kinodagi “sehr”ni umumiy foydalanishdagi yo‘llarga ko‘chirishga qaror qildi. “Forsaj”ning to‘qqizinchi qismi uchun to‘qqizta o‘rta motorli Dodge Charger’ning shassi va kuzovini loyihalash hamda yaratishdan so‘ng, SpeedKore egasi Jim Kamarchich kinomobilning oddiy yo‘lga mo‘ljallangan versiyasini yaratishga qaror qildi, deb xabar beradi Motor.
SpeedKore o‘zining so‘nggi ishini Hellacious deb atagan bo‘lib, bu “iblisona” deb tarjima qilinadi. O‘rta motorli kupe rostdan ham telba dahoning ijodi kabi ko‘rinish olgan. Shu bilan birga, mashina tashqi ko‘rinishi bilan 1968-yilgi Dodge Charger’ni yodga soladi.
Hellacious motori o‘rindiqlar ortiga o‘rnatilgan. Bu uzatmali “nagnetatel” (ichki yonish dvigatellarida silindrga keladigan havoni oldindan siqib beruvchi kompressor) va yuqori samaradorlikka ega Saldana radiator, 717 ot kuchi hamda 811 Nm aylanuvchi momentni taqdim etishga qodir 6,2 litrli V8 Hellcat motori. Uzatmalar qutisi Lamborghini Gallardo’ning transaxle “mexanika” sxemasi bo‘yicha yaratilgan. Tormozlanishga old tomonda olti porshenli, orqa tarafda to‘rt porshenli Brembo mexanizmlari javob beradi. Drift uchun gidravlik “ruchnik” ham bor.
Kupe Dominik Toretto “Forsaj”ning to‘qqizinchi qismida boshqargan mashinaga quyib qo‘ygandek o‘xshaydi. Kuzov panellari yaxlit karbondan ishlangan. Salonida kalta suyanchiqli ikkita o‘rindiq bor, motor bo‘lmasi shisha to‘siqqa ega. Dvigatelning o‘zi esa namoyishga qo‘yilgan: u Charger’ning orqa oynasi orqali yaxshi ko‘rinadi.
Avvalroq “Forsaj” bosh qahramoniga tegishli Toyota Supra auksion orqali rekord qiymatda sotilgani to‘g‘risida xabar berilgandi.
Izoh (0)