2019-yilda Sotheby’s auksioni orqali McLaren F1 superkari 19,805 million dollarga sotilib, rekord o‘rnatgandi. Shassi raqami 018 bo‘lgan mashina 25 yil davomida 21,5 ming kilometr yo‘l bosgan xolos va ishlab chiqaruvchi tomonidan LM spetsifikatsiyasiga qadar ishlangan ikkita kupedan biri hisoblanardi: dvigateli poyga GTR’niki va High-Downforce Kit “obvesi”. Yaqindagina Gooding & Company katalogida paydo bo‘lgan McLaren F1 esa bundan ham qimmatroqqa sotilishi mumkin. U hozirga qadar 390 kilometr yo‘l bosgan va holati idealga yaqin, hatto uning original shinalari saqlanib qolgan, deb xabar beradi Motor.
Zavod reyestridagi qaydlarga ko‘ra, shassi raqami 029 bo‘lgan McLaren F1 — bu 1992-yildan 1998-yilga qadar bo‘lgan davrda yaratilgan 25-superkar hisoblanadi. Shu bilan birga, u o‘z tirajida kompaniyaning shakllanishida muhim rol o‘ynagan McLaren Cars rahbarlaridan birining sharafida nomlangan Creghton Brown rangiga bo‘yalgan yagona model. Ikki eshikli mashina saloni Light Tan va Dark Brown charmlari bilan qoplangan, qo‘shimcha aksessuarlari ro‘yxatidan titanli uskunalar, TAG Heuer soatlari va yo‘l sumkalari jamlanmasi o‘rin olgan.
Superkar “umrining” asosiy qismini Yaponiyadagi xususiy kolleksiyada o‘tkazgan, biroq hozirda u AQShga olib kelingan. Mashinaning egasi uni original holatda saqlab qolish uchun katta mehnat qilgan, shu sababli unga hamon zavoddagi Goodyear Eagle F1 shinalari kiygizilgan. Gooding & Company auksioni vakillarining so‘zlariga ko‘ra, kolleksionerlarda hozirga qadar auksionlarga qo‘yilgan eng kam masofa bosgan avtomobilni xarid qilish imkoniyati paydo bo‘lgan, biroq uning narxi arzon bo‘lmasligi aniq.
McLaren F1 627 ot kuchi va 650 Nm aylanuvchi momentni taqdim etishga qodir 6,1 litrli (BMW S70/2) V12 atmosfera dvigateli bilan jihozlangan. Uzatmalar qutisi — olti pog‘onali mexanika bo‘lib, u Amerikaning Wiesmann Transmissions firmasi bilan hamkorlikda yaratilgan. Kupe soatiga 100 kilometr tezlikka 3,2 soniyada erishadi. Maksimal tezligi — 372 kilometr/soat. 2005-yilga qadar McLaren F1 dunyodagi eng tezkor mashina bo‘lgan va keyinchalik ushbu nom Bugatti Veyron’ga nasib etgan.
Mavzuga doir: Uch nusxada ishlab chiqarilgan noyob McLaren Senna Can-Am modeli auksionga qo‘yildi (foto)
Izoh (0)