Moskva shahri YHXBB xodimlari navbatdagi reyd davomida yo‘l qoidalarini buzgani uchun hozirga qadar 1,2 million rubllik (16,6 ming dollar) jarimalari to‘planib qolgan Hyundai Solaris egasini qo‘lga oldi. Jarimalar miqdori mashina qiymatidan ortib ketgani sabab avtomobil sud nozirlariga topshirilgan, deb xabar beradi Motor.
Idora vakillarining so‘zlariga ko‘ra, haydovchi muntazam ravishda uzoq vaqtdan buyon yo‘l-harakati qoidalarini buzib kelgan. Biroq erkak jarimalardan birortasini to‘lamagan. YHXBB xodimlarining navbatdagi reydi davomida qoidabuzarni qo‘lga olishga muvaffaq bo‘lingan. Qizil Hyundai Solaris hisobida umumiy qiymati 1,2 million rubllik 680 ta qoidabuzarlik mavjud. Avtomobil muhrlanib, sud nozirlariga topshirilgan.
Rossiya qonunchiligiga ko‘ra, avtomobil egasi qoidabuzarlikni sodir etganidan so‘ng, 10 kun ichida bu bo‘yicha shikoyat kiritishga va 60 kun davomida jarimani to‘lashga haqli. Qarzdor jarimalarni to‘lashdan bosh tortsa, uning mulki musodara qilinadi, shuningdek, xorijga mashina haydashiga taqiq qo‘yiladi. Moskva YHXBB ma’lumotlariga ko‘ra, 2021-yilning dastlabki besh oyida jarimani to‘lashdan bosh tortganlik bo‘yicha 240 mingga yaqin ma’muriy bayonnomalar tuzilgan.
Avvalroq Sidneyda Subaru BRZ haydovchisi 11 daqiqa ichida qariyb 8 ming dollarlik jarimaga tortilgani, mamlakatda bunday qoidabuzarlik uchun qamoq jazosi berilishi mumkinligi to‘g‘risida xabar berilgandi.
Izoh (0)