Avstraliyaning Sidney shahrida istiqomat qiluvchi 23 yoshli fuqaro tunda o‘zining Subaru BRZ avtomobilida sayrga chiqishga qaror qilgan. U 11 daqiqalik harakat davomida 7750 AQSh dollari miqdorida jarimaga tortilishini xayoliga ham keltirmagan. Endilikda erkak to‘qqiz oygacha ozodlikdan mahrum etilishi, transport vositasi esa musodara qilinishi mumkin, deb xabar beradi Motor.
Tungi Sidney ko‘chalari va Subaru BRZ sport avtomobili — Avstraliya fuqarosi buni ideal kecha sifatida tasavvur qilgan. Biroq erkak trassaga chiqishi bilan uning sportkari uzra avtomobil tezligini teplovizion kamera yordamida kuzatuvchi politsiya vertolyoti paydo bo‘lgan. Haydovchi belgilangan tezlik me’yorini oshirganini ko‘rgan politsiyachilar yerdagi patrulga qoidabuzar haqida ma’lumot bergan.
Yo‘l patruli Subaru’ni darhol to‘xtatgan, ofitserlar haydovchining hujjatlarini tekshirib, erkakka nisbatan biror ayblov bildirmasdan qo‘yib yuborgan. Ammo teplovizor qaydlari va boshqa kuzatuv kameralaridagi yozuvlar qayta o‘rganib chiqilgach, politsiyachilar erkak kamida besh marotaba soatiga 20 kilometrdan ortiq tezlikni oshirganini aniqlagan. Eng katta oshirilgan tezlik — belgilangan me’yordan 50 kilometr/soatga ko‘p.
Politsiya tezlikni tizimli ravishda oshirgan haydovchiga xavfli boshqaruv bo‘yicha ayblov e’lon qilgan. Avstraliya qonunlariga ko‘ra, bu kabi qoidabuzarlik uchun to‘qqiz oygacha ozodlikdan mahrum etilish, shuningdek, bir yilga haydovchilik guvohnomasidan ayrilish va avtomobil musodara qilinishi mumkin.
Eslatib o‘tamiz, 2020-yilning iyulida Italiyada Ford Focus haydovchisiga mashinani soatiga 703 kilometr tezlikda haydagani uchun jarima kelgandi.
Izoh (0)