Москвада 680 та қоидабузарлиги учун жарималарни тўламай келган ҳайдовчи қўлга олинди. Жарималар миқдори Hyundai машинасининг нархидан ошиб кетган

Москва шаҳри ЙҲХББ ходимлари навбатдаги рейд давомида йўл қоидаларини бузгани учун ҳозирга қадар 1,2 миллион рубллик (16,6 минг доллар) жарималари тўпланиб қолган Hyundai Solaris эгасини қўлга олди. Жарималар миқдори машина қийматидан ортиб кетгани сабаб автомобиль суд нозирларига топширилган, деб хабар беради Motor.

Идора вакилларининг сўзларига кўра, ҳайдовчи мунтазам равишда узоқ вақтдан буён йўл-ҳаракати қоидаларини бузиб келган. Бироқ эркак жарималардан бирортасини тўламаган. ЙҲХББ ходимларининг навбатдаги рейди давомида қоидабузарни қўлга олишга муваффақ бўлинган. Қизил Hyundai Solaris ҳисобида умумий қиймати 1,2 миллион рубллик 680 та қоидабузарлик мавжуд. Автомобиль муҳрланиб, суд нозирларига топширилган.

Россия қонунчилигига кўра, автомобиль эгаси қоидабузарликни содир этганидан сўнг, 10 кун ичида бу бўйича шикоят киритишга ва 60 кун давомида жаримани тўлашга ҳақли. Қарздор жарималарни тўлашдан бош тортса, унинг мулки мусодара қилинади, шунингдек, хорижга машина ҳайдашига тақиқ қўйилади. Москва ЙҲХББ маълумотларига кўра, 2021 йилнинг дастлабки беш ойида жаримани тўлашдан бош тортганлик бўйича 240 мингга яқин маъмурий баённомалар тузилган.

Аввалроқ Сиднейда Subaru BRЗ ҳайдовчиси 11 дақиқа ичида қарийб 8 минг долларлик жаримага тортилгани, мамлакатда бундай қоидабузарлик учун қамоқ жазоси берилиши мумкинлиги тўғрисида хабар берилганди.