Xiaomi kamera, 4G va keng sig‘imli akkumulyatorga ega “aqlli” soatini 60 dollardan arzonroqqa sotishni boshladi

Xiaomi kompaniyasi bolalar uchun mo‘ljallangan o‘zining yangi gadjetini taqdim etdi. “Aqlli” soatlar Xiaomi Mi Rabbit Children’s Phone Watch 5C 4G nomi ostida chiqarilgan, deb xabar beradi IXBT.

Yangi qurilma to‘rtinchi avlod aloqa tarmog‘ini qo‘llab-quvvatlaydi va smartfondan foydalanmasdan turib qo‘ng‘iroqlarni amalga oshirish imkonini beradi. Soatning old panelida keng burchakli kamera joylashgan bo‘lib, uning yordamida videoaloqa bo‘yicha qo‘ng‘iroqlarni amalga oshirish mumkin.

Xiaomi Mi Rabbit Children’s Phone Watch 5C 4G, shuningdek, o‘z egasiga turgan joyni aniq kuzatish va XiaoAI ovozli yordamchisidan foydalanish imkoniyatini beradi. Qurilma namlikdan himoyalangan, akkumulyator sig‘imi 900 mA/soat.

Xiaomi Mi Rabbit Children’s Phone Watch 5C 4G “aqlli” soatlari bolaning faolligini, uning maktab va uyga qatnashini, shuningdek, istalgan vaqtda qayerda ekanligini kuzatishga yordam beradi. Soat diagonali 1,4 dyuym bo‘lgan rangli ekran bilan jihozlangan, shu bilan birga, soatlar turli foydali dasturlarni qo‘llab-quvvatlaydi.

Ayni vaqtda Xiaomi Mi Rabbit Children’s Phone Watch 5C 4G Xitoyning JD.com internet do‘koni orqali 58 dollardan sotilmoqda.

Avvalroq Xiaomi bir marta quvvatlanish orqali 30 kungacha ishlay oladigan “aqlli” soatini taqdim etgani to‘g‘risida xabar berilgandi.