Britaniyaning The Telegraph gazetasi 2022-yilda taqdim etiladigan Apple Watch Series 8 “aqlli” soatlarining yangi funksiyalari to‘g‘risida ma’lumot berdi. Ular arterial bosim, shuningdek, qondagi qand va alkogol miqdorini invaziv bo‘lmagan usullar orqali o‘lchay oladi, deb xabar beradi Hi-Tech.Mail.ru.

Foto: Pixabay

Ma’lumotlarga ko‘ra, Apple o‘ziga sherik sifatida Rockley Photonics kompaniyasini tanlagan — u soatlar inson organizmidagi yangi ko‘rsatkichlarni o‘lchay olishini ta’minlaydigan optik datchiklarni yetkazib berish bilan shug‘ullanadi. Bunga qadar ushbu kompaniya bosh direktori bosim, qand va alkogol miqdorini o‘lchaydigan datchikli tijoriy qurilmalarning birinchisi 2022-yilda paydo bo‘lishini ommaga e’lon qilgandi.

Apple Watch Series 6 soatlari pulsni, qondagi kislorod miqdorini o‘lchay oladi va EKGning soddalashtirilgan versiyasini yozib oladi — bu qurilma inson sog‘lig‘ida jiddiy muammo borligini oldindan aniqlash uchun yetarli. Inson sog‘lig‘ining yana uchta yangi ko‘rsatkichi esa soatlarning salomatlikni monitoring qilish imkoniyatini oshiradi. Bu diabet, gipertoniya va boshqa ko‘plab kasalliklar yuzaga kelishining oldini oladi.

Qondagi alkogol miqdorini aniqlash orqali, masalan, foydalanuvchini avtomobil boshqarish uchun haddan ortiq mastligi haqida ogohlantiradi. Buni avtomobilning bort tizimiga bog‘lab qo‘yish orqali ushbu ko‘rsatkich ortib ketganda mashinani o‘t olmaydigan qilib qo‘ysa bo‘ladi.

Avvalroq Apple Watch “aqlli” soati pulsning tez ekani sabab 4 oy davomida rossiyalik Aleksandra Rumyansevaga mashg‘ulot rejimini yoqish kerakligini eslatib turib, uning hayotini saqlab qolgani to‘g‘risida xabar berilgandi.