Belarus o‘ziga qarshi G‘arb sanksiyalarini iqtisodiy urushga qiyosladi

Belarus G‘arb sanksiyalarini iqtisodiy urush sifatida qabul qilmoqda. Bunday qiyoslash Belarus Tashqi ishlar vazirligining Yevropa Ittifoqi, AQSh, Buyuk Britaniya va Kanada tomonidan kiritilgan sanksiyalarga munosabatida aytib o‘tildi.

“Afsuski, har qanday muloqot va hamkorlik o‘rniga, bizning g‘arblik sheriklarimiz suveren davlatga nisbatan sanksiyalar va bosimlarni amalga oshirishda davom etmoqda”, — deyiladi TIV bayonotida.

“Buning fonida Yevropa Ittifoqi rahbariyatining bayonoti ochiq masxaralash, mantiq va sog‘lom fikrning ustidan kulishdek ko‘rinadi. Bugun Yevropa Ittifoqi Belarus xalqiga yangi cheklov choralarini qo‘llash orqali kuchli signal yubordi. Ishonchimiz komilki, sanksiyalarga uchragan korxonalarning mehnat jamoalari, ularning qarindoshlari, oilalari va boshqa belaruslar Yevropa Ittifoqining bunday ‘saxovatli ko‘magi’ni to‘g‘ri va yetarli darajada baholaydi”, — deydi Belarus TIV.

Vazirlik o‘z fuqarolari va tadbirkorlik subyektlarini himoya qilish uchun qo‘lidan kelgan barcha ishni qilishini qo‘shimcha qildi. “Sanksiyalar va cheklovlar ular kutgan natijani bermaydi. Yevropa Ittifoqi bizga majburan qabul qildirayotgan choralar o‘zaro hamkorlikdagi sohalarimizga, shuningdek, davlatimizga nisbatan dushmanona qadamlarni tashlagan G‘arb mamlakatlari fuqarolari va kompaniyalari manfaati uchun ham salbiy ta’sir ko‘rsatishi mumkin”, — deyiladi bayonotda.

21-iyun kuni Yevropa Ittifoqi Belarusga qarshi to‘rtinchi sanksiyalar paketini joriy etayotgani ma’lum bo‘ldi. Sanksiyalar 86 jismoniy shaxs va kompaniyaga, shu jumladan, Aleksandr Lukashenkoning oila a’zolariga ta’sir qiladi.

Shuningdek, AQSh  Belarus kompaniyalari va ayrim fuqarolariga qarshi yangi sanksiyalar paketini joriy qilgandi. Vashington sanksiyalar ro‘yxatiga oltita yuridik va 16 jismoniy shaxsni, shu jumladan, Belarus Davlat xavfsizlik qo‘mitasini kiritgan.