Беларусь Ғарб санкцияларини иқтисодий уруш сифатида қабул қилмоқда. Бундай қиёслаш Беларусь Ташқи ишлар вазирлигининг Европа Иттифоқи, АҚШ, Буюк Британия ва Канада томонидан киритилган санкцияларга муносабатида айтиб ўтилди.
«Афсуски, ҳар қандай мулоқот ва ҳамкорлик ўрнига, бизнинг ғарблик шерикларимиз суверен давлатга нисбатан санкциялар ва босимларни амалга оширишда давом этмоқда», — дейилади ТИВ баёнотида.
«Бунинг фонида Европа Иттифоқи раҳбариятининг баёноти очиқ масхаралаш, мантиқ ва соғлом фикрнинг устидан кулишдек кўринади. Бугун Европа Иттифоқи Беларусь халқига янги чеклов чораларини қўллаш орқали кучли сигнал юборди. Ишончимиз комилки, санкцияларга учраган корхоналарнинг меҳнат жамоалари, уларнинг қариндошлари, оилалари ва бошқа беларуслар Европа Иттифоқининг бундай ‘саховатли кўмаги’ни тўғри ва етарли даражада баҳолайди», — дейди Беларусь ТИВ.
Вазирлик ўз фуқаролари ва тадбиркорлик субъектларини ҳимоя қилиш учун қўлидан келган барча ишни қилишини қўшимча қилди. «Санкциялар ва чекловлар улар кутган натижани бермайди. Европа Иттифоқи бизга мажбуран қабул қилдираётган чоралар ўзаро ҳамкорликдаги соҳаларимизга, шунингдек, давлатимизга нисбатан душманона қадамларни ташлаган Ғарб мамлакатлари фуқаролари ва компаниялари манфаати учун ҳам салбий таъсир кўрсатиши мумкин», — дейилади баёнотда.
21 июнь куни Европа Иттифоқи Беларусга қарши тўртинчи санкциялар пакетини жорий этаётгани маълум бўлди. Санкциялар 86 жисмоний шахс ва компанияга, шу жумладан, Александр Лукашенконинг оила аъзоларига таъсир қилади.
Шунингдек, АҚШ Беларусь компаниялари ва айрим фуқароларига қарши янги санкциялар пакетини жорий қилганди. Вашингтон санкциялар рўйхатига олтита юридик ва 16 жисмоний шахсни, шу жумладан, Беларусь Давлат хавфсизлик қўмитасини киритган.
Аввал АҚШ президенти Жо Байден Беларусга қарши 2006 йилда киритилган санкциялар муддатини бир йилга узайтиргани, Чехия парламенти Сенати Беларусь мухолифати етакчиси Светлана Тихановскаяни мамлакат президенти деб тан олгани ҳақида хабарлар берилганди.
Изоҳ (0)