Тошкент вилоятининг Қозоғистон чегараси яқинида постдан ўтувчилар учун қалбаки ПЦР-тест маълумотномасини тайёрлаб берган шахс қўлга тушди, дея хабар бермоқда ЎзА.
Қайд этилишича, 2021 йилнинг 19 май куни Тошкент вилояти ИИББ Хавфсиз туризмни таъминлаш бошқармаси ходимлари томонидан Тошкент туманида жойлашган «Ғишт кўприк» божхона пости атрофида, тахминан, 35—40 ёшларда бўлган, О. исмли шахс Қозоғистонга ўтмоқчи бўлган фуқароларга 100 минг сўм пул эвазига коронавирус касаллигига чалинмагани тўғрисида қалбаки (ПЦР) маълумотнома тайёрлаб бераётгани ҳақида тезкор маълумот олинади.
Ҳолат юзасидан ўтказилган тадбир давомида Тошкент тумани «Ғишт кўприк» МФЙда яшовчи 1984 йилда туғилган А.Д. назоратдаги аризачидан 100 минг сўм миқдоридаги пул эвазига коронавирус касаллигига чалинмагани тўғрисида қалбаки маълумотномани ясаб, унга берган вақтида бошқарма ходимлари томонидан холислар иштирокида ушланган.
Тадбир давомида фуқаро А.Д. аризачидан олган пули ва қалбаки маълумотномани тайёрлаб чиқарган Epson L120 русумли принтер ашёвий далил сифатида олинди. Ҳолат юзасидан компьютер-техник экспертизаси тайинланган.
Ҳозирда шу ҳолат юзасидан Жиноят кодексининг тегишли моддаси билан жиноят иши қўзғатиш чоралари кўрилмоқда.
ИИББ ахборот хизмати қайд этишича, бу каби ҳаракатлар БҲМнинг 50 бараваридан 100 бараваригача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари билан жазоланади.
Бундан аввал Фарғонада сохта ПЦР-тест натижаларини 100 минг сўмга сотиш билан шуғулланган шахс ушлангани, Наманган ва Самарқандда сохта ПЦР-тестларни сотаётган шахслар ушлангани ҳамда Деновда сохта ПЦР-тест натижаларини сотиш билан шуғулланган тиббиёт ходимлари қўлга олингани ҳақида хабар берилганди.
Изоҳ (0)