Maqsadi sari faqat olg‘a yuradigan, hayot qiyinchiliklarini yenga olgan afsonaviy gimnastikachi Oksana Chusovitina 46 yoshga to‘ldi. U Tokio Olimpiadasida qatnashadi

Yettita yozgi Olimpiada o‘yinlari ishtirokchisi, Ginnesning rekordlar kitobidan joy olgan o‘zbekistonlik gimnastikachi Oksana Chusovitina 19-iyun kuni o‘zining 46 yoshini qarshi oldi.

Badiiy gimnastika afsonasi 1975-yil Buxoro viloyatida tavallud topgan. 1991-yildan sobiq ittifoq tarkibida xalqaro musobaqalarda faoliyatini boshlagan. O‘sha yilning o‘zida Barselonada bo‘lib o‘tgan Olimpiadada MDH nomidan ishtirok etadi va jamoaviy bahslarda oltin medalni qo‘lga kiritadi. 17 yoshli Oksana uchun bu muvaffaqiyatning birinchi zinasi edi.

Shundan so‘ng Atlantada (1996), Sidneyda (2000) bo‘lib o‘tgan Olimpiadalarda ishtirok etgan Chusovitina sovrindorlar qatoriga kira olmadi.

Shunga qaramasdan go‘yo hammasi yaxshidek edi. Ammo kunlarning birida uning farzandiga leykemiya (oqqon) tashxisi qo‘yiladi. 2002-yilda farzandini davolatish maqsadida oilasi bilan birga Germaniyaga ketishga majbur bo‘ladi. Oksananing turmush o‘rtog‘i yunon-rum kurashi ustasi Bahodir Qurbonov ham faoliyatini yakunlashiga to‘g‘ri keladi. 3 yoshli Alisherning davolanishiga “Kyoln” sport jamoasi yordam qo‘lini cho‘zadi.

Chusovitinaning o‘zi Germaniyadagi hayotini yodga olib shunday deydi:

Alisher o‘shanda 3 yoshda edi. Bu kasallik unda qanday paydo bo‘lganini bilmaymiz. Ko‘pchilik uning davolanishi uchun pul topish maqsadida mashg‘ulotlarni davom etganim haqida yozadi. Aslida sabab boshqa edi — agarda men kun bo‘yi shifoxonada o‘tirsam, aqldan ozardim. U yerdagi kasal bolalarni ko‘zlariga qarash og‘ir edi. Germaniyada bolalar kasallikdan vafot etardi. Sport zalda men ozgina bo‘lsa ham chalg‘irdim.

Shundan so‘ng Chusovitina jarohatlar girdobida qoladi. Ikki yelkasi va oyog‘idan olgan jarohati sabab operatsiya qilinadi. Endi katta sportdagi faoliyatini yakunlab, sog‘lik haqida o‘ylashni o‘rniga Oksana faoliyatini davom ettirishga qaror qiladi. 2012-yilda Londonda bo‘lib o‘tadigan Olimpiadaga yo‘l oladi.

2013-yilda esa Chusovitina oilasi bilan birga O‘zbekistonga qaytib keladi. 20 yildan oshiq vaqt mobaynida professional faoliyatini olib borayotgan Chusotivina 2016-yilda Braziliyada bo‘lib o‘tadigan Olimpiada musobaqasida ishtirok etishini e’lon qildi. Oksana Riodagi Olimpiadaga qatnashib O‘zbekiston uchun medal qo‘lga kiritishni istardi. Afsuski, omad yana undan yuz o‘giradi.

Oksana Chusotivina Tokioda bo‘lib o‘tadigan yozgi Olimpiadada ham ishtirok etmoqchi ekanligini ham aytib kelardi. 40 yoshni qoralagan sportchining bu gaplari kim uchun hazil, yana kim uchundir esa chin edi. Oksana o‘z so‘zining ustidan chiqdi va Tokio Olimpiadasiga yo‘llanmani qo‘lga kiritdi. Bu uning faoliyatidagi sakkizinchi Olimpiadasi bo‘ladi.

“Buning siri nimada?” — ko‘plab jurnalist va muxlislar tomonidan beriladigan savol. “Hech qanday sir yo‘q. Shunchaki hech kim gimnastikada bu qadar ko‘p qolishga urinib ko‘rmagan. Har kuni o‘zimga maqsad qo‘yaman. Meni hech kim majburlamaydi. Bu qiziqish: uddalay olamanmi yoki yo‘q”, — deya kamtarona javob beradi Chusovitina.

Oksana Chusovitina faoliyatiga oid statistika va faktlar

• MDH terma jamoasi safida 1992-yilgi Olimpiada chempioni.
• 2008-yilgi Olimpiya o‘yinlari vitse-chempioni.
• Uch karra Jahon chempioni (1991-yilda jamoaviy bahslar (SSSR terma jamoasi) va erkin mashq, 2003-yilda tayanib sakrash).
• Jahon chempionatlarida to‘rt karra kumush (1991, 2001, 2005 va 2011-yillar) va 4 karra bronza medali (1992, 1993, 2002, 2006) sohibi.
• Tayanib sakrash bo‘yicha Yevropa chempioni (2008-yil), kumush medal (2002) va uch karra bronza egasi.
• Yettita Olimpiadada qatnashgan yagona gimnastikachi. Sporchi ushbu natijasi evaziga Ginnesning rekordlar kitobiga kiritilgan.
• Faoliyatini davom ettirayotgan vaqtda nomi sport gimnastikasi Xalqaro shon-shuhrat zaliga kiritilgan yagona sportchi.