O‘zbekiston futbol assotsiatsiyasining navbatdan tashqari kongressi 19-iyun, shanba kuni Milliy olimpiya qo‘mitasining majlislar zalida bo‘lib o‘tdi. Unda so‘zga chiqqan O‘zbekiston terma jamoasi sardori Odil Ahmedov bosh jamoadagi faoliyatini yakunlaganini e’lon qildi, deya xabar beradi “Daryo” muxbiri.

Shu joyda juda ko‘p gapirildi. Ammo bitta narsani aytmoqchiman: futbolni aldab bo‘lmaydi.

Bugun o‘zgarmasak, har 4 yilda shunday turib kechirim so‘raymiz. Futbolchi bo‘ladimi, murabbiy bo‘ladimi, shu sohadagi odam bo‘ladimi — futbolning manfaatini birinchi o‘ringa qo‘ymasa, bizda hech qachon natija bo‘lmaydi. Bu katta detallardan biri. Maydalari esa juda ko‘p.

Rossiyada, Xitoyda o‘ynadim, biz har tomonlama orqadamiz. Asosiy muammolarimizdan biri — bolalar futbolini to‘g‘ri yo‘lga qo‘ymaganimizdir.

Terma jamoadagi faoliyatimni yakunladim.

Odil Ahmedov, futbolchi

Ma’lumot uchun, Odil Ahmedov O‘zbekiston milliy terma jamoasidagi debyut o‘yinini 2007-yil 13-oktabrda Xitoy Taypeyiga qarshi (9:0) o‘tkazgan. 33 yoshni futbolchi mamlakat bosh jamoasi safida 108 o‘yinda maydonga tushib, 20 ta golga mualliflik qilgan.