Dunyo va o‘zbek sportiga oid 16-iyun kunining muhim xabarlari dayjesti bilan tanishing.
O‘zbekiston
JCh—2022 dan quruq qolgan O‘zbekiston milliy terma jamoasi Toshkentga qaytib keldi
16-iyun kuni O‘zbekiston delegatsiyasi Toshkentga yetib keldi. Biroq terma jamoa vakillari orasida bosh murabbiy Vadim Abramov ko‘rinish bermagan. “Championat.asia” xodimlari O‘zbekiston terma jamoasi a’zolaridan kichik intervyu berishni so‘ragan, biroq ko‘pchilik bu takliflarni rad etgan. Terma jamoa yordamchi murabbiyi Anvar G‘ofurov jurnalistlarga hozir intervyuning mavridi emasligini aytayotgan vaqtda aeroport atrofiga yig‘ilgan muxlislar mutaxassisdan izoh talab qila boshladi. Xususan, ular nima sababdan Saudiya Arabistoniga qarshi o‘yinda taktika o‘zgargani, ayrim futbolchilar zaxirada qolib ketgani va shu kabi savollarga javob talab qilgan. Mutaxassis ularning ayrimlari javob qaytargan va murabbiylar shtabining maqsadi ham g‘alaba qozonish ekanini alohida ta’kidlagan.
Shuningdek, terma jamoalar bo‘limi rahbari Aziz Haydarov ham o‘z fikrlarini bildirib o‘tdi. Mutasaddi Abramov o‘yinga ikki kun qolganda o‘yin uslubini o‘zgartirgani haqida gapirdi va o‘ziga qolsa allaqachon Abramovni ishdan olib tashlagan bo‘lishini aytdi. Batafsil bu yerda o‘qing.
Shohjahon Ergashev uylandi
15-iyun kuni o‘zbekistonlik bokschi Shohjahon Ergashev uylandi. 12-iyun kuni bokschi Toshkentda professional faoliyatidagi 20-jangini o‘tkazgan va unda tanzaniyalik raqibini muddatidan avval mag‘lub etgandi.
Jahon
Yevro—2020 da 2-tur boshlandi. 16-iyun kuni A va B guruhidagi o‘yinlar bo‘lib o‘tdi. Italiya terma jamoasi Shveysariyaning yirik hisobda taslim etib, musobaqa yo‘llanmasini muddatidan avval hal qildi. Shu tariqa Italiya ketma-ket 29-o‘yinda mag‘lubiyatga uchramadi. Jamoa rekordining takrorlanishiga yana bitta o‘yin qoldi. Italiya ketma-ket to‘rtinchi Yevroda pley-off bosqichiga yo‘l oldi. So‘nggi bor 2004-yilgi musobaqada Shvetsiya va Daniya uni guruhda qoldirib ketgandi.
Ramos “Real”ni tark etadi
“Real” himoyachisi Serxio Ramos 16 yillik faoliyatidan keyin madridliklar safini tark etmoqda. Bu haqda klub rasman ma’lum qildi. Hozircha futbolchi qaysi klubga o‘tishi ma’lum emas.
Ronaldu boshlab bergan “chellenj” davom etadi
Fransiya terma jamoasi yarim himoyachisi Pol Pogba Yevro—2020 1-turi doirasida Germaniyaga qarshi kechgan o‘yindan (1:0) keyingi matbuot anjumanida qatnashdi. Futbolchi anjuman vaqtida yonida turgan pivo idishini nariroqqa surib qo‘ydi. Avvalroq Ronaldu matbuot anjumani vaqtida Coca-Cola solingan idishlarni nariga surib qo‘ygandi.
Eslatib o‘tamiz, Pogba musulmon diniga e’tiqod qiladi.
[twitter count="1404936807960039426" user="laoctavasports"]
Millatchilikda ayblangan Arnautovich diskvalifikatsiya qilindi
Avstriya terma jamoasi hujumchisi Marko Arnautovich Shimoliy Makedoniyaga qarshi o‘yinda raqib futbolchilarining kelib chiqishini haqorat qilgani uchun UEFA tomonidan Yevroning bitta o‘yiniga diskvalifikatsiya qilindi. Shu tariqa futbolchi Niderlandiyaga qarshi o‘yinni o‘tkazib yuboradi.
APL 2021/22-yilgi mavsum taqvimi e’lon qilindi
Angliya Premyer Ligasining 2021/22-yilgi mavsumi taqvimi e’lon qilindi. Unga ko‘ra yangi mavsum 14-avgust kuni start oladi va 22-mayga qadar davom etadi.
1-tur ro‘yxati bilan tanishing (to‘liq taqvim)
- “Brentford” — “Arsenal”
- “Byornli” — “Brayton”
- “Chelsi” — “Kristal Pelas”
- “Everton” — “Sauthempton”
- “Lester” — “Vulverhempton”
- “Manchester Yunayted” — “Lids”
- “Nyukasl” — “Vest Hem”
- “Norvich” — “Liverpul”
- “Tottenhem” — “Manchester Siti”
- “Uotford” — “Aston Villa”
“Manchester Siti” yozgi transfer oynasida hujum chizig‘ini kuchaytirmoqchi. “Shaharliklar”ning asosiy maqsadi “Tottenhem” forvardi Harri Keyn bo‘lib turibdi. Shuningdek, “Siti” short-listida Joau Feliks (“Atletiko”) va Mikel Oyarsabal (“Real Sosyedad”) kabi futbolchilar bor, deya xabar qilmoqda Eurosport.
“Chelsi” “Borussiya D”dan Erling Holandni sotib olmoqchi. Londonliklar norvegiyalik futbolchi uchun o‘z hujumchisi Temmi Abraham va qo‘shimcha 70 million yevro taklif qilgan. Biror futbolchi qo‘shilmagan taqdirda transfer “ko‘klar”ga 200 million yevroga tushishi mumkin.
Kopa Amerikada koronavirus bilan bog‘liq vaziyat jiddiylashmoqda
Braziliyada o‘tayotgan Amerika Kubogi—2021 da musobaqa ishtirokchilarida yana 11 ta koronavirusga chalinish holati qayd etildi. Umumiy hisobda 53 kishi virus yuqtirib olgan. Qayd etilishicha, ularning kamida 20 nafari futbolchilar.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)