“O‘zbekiston temir yo‘llari” tomonidan “Navoiy—Buxoro uchastkasida elektrlashtirilgan ikkinchi yuqori tezlikdagi temiryo‘l qurilishi” loyihasi amalga oshirilmoqda. Bu haqda kompaniya matbuot xizmati xabar berdi.
Qayd etilishicha, bugungi kunda Toshkent—Samarqand, Toshkent—Qarshi hamda Toshkent—Buxoro yo‘nalishida yuqori tezlikda harakatlanadigan “Afrosiyob” poyezdlarining muntazam qatnovi amalga oshiriladi. Toshkent—Samarqand—Maroqand uchastkasi 2 yo‘nalishli po‘lat izlardan tashkil topgan bo‘lsa, Navoiy—Buxoro yo‘nalishi bir izli temiryo‘l uchastkasidan iborat.
“Shu bois O‘zbekiston temiryo‘lchilari tomonidan bir izli Navoiy—Buxoro uchastkasida 2-yo‘nalish uchun temiryo‘l bunyod etilishi natijasida tezyurar hamda yuqori tezlikda harakatlanadigan poyezdlar qatnovining qulay, xavfsiz va ishonchli bo‘lishiga zamin yaratadi. Eng muhimi, yo‘lovchi poyezdlar qatnovi vaqtini yanada qisqartirishga erishiladi”, — deb ta’kidlanmoqda kompaniya xabarida.
Ma’lum qilinishicha, Navoiy—Buxoro uchastkasining 2-yo‘nalishi uzunligi 92,3 kilometrdan iborat bo‘lib, “O‘zbekiston temir yo‘llari” aksiyadorlik jamiyatining o‘z mablag‘lari hisobiga barpo etilmoqda. Belgilangan loyihaga ko‘ra, ushbu uchastkada 3 ta razyezd, 1 ta temiryo‘l o‘tkazgichini qurish, 12 ta temir-beton ko‘prik, 49 ta sun’iy inshoot qurilishi hamda 3 ta texnik xizmat ko‘rsatish binosini qurish ko‘zda tutilgan.
Ayni paytda loyihadagi 5 ta temir-beton ko‘prigini qurish uchun poydevor tayyorlash ishlari bajarilmoqda. “Quyimozor—Raz’yezd-40” oralig‘ida esa 2 kilometr temiryo‘l izlari yotqizilgan. Buning uchun qurilish obyektlarida yuzdan ortiq zamonaviy texnikalardan foydalanilmoqda.
“Ta’kidlash lozimki, ushbu loyiha hayotga tatbiq etilgach, ekspluatatsion xarajatlarni kamaytirishga erishiladi. Harakat tezligini oshirish hisobiga iste’molchilarga xizmat ko‘rsatish sifatini yuksaltirish imkoniyati yaratiladi. Yangi temiryo‘l uchastkasini qurish orqali o‘tkazuvchanlik qobiliyatini ko‘tarish, yangi ish joylarini tashkil qilish, yuk vagonlari aylanmasining ortishi hisobiga harakat tarkibiga bo‘lgan talabni qisqartirish, loyiha hududi ekologik muhitini yaxshilash, zamonaviy kommunikatsiya tizimi va resurs tejash texnologiyalari rivojlanishini ta’minlashga muvaffaq bo‘linadi”, — deyiladi xabarda.
Izoh (0)