Жаҳон банки Ижрочи директорлар кенгаши мамлакатимиз учун аҳамиятли бўлган Ўзбекистон солиқ маъмуриятчилигини ислоҳ қилиш лойиҳасини маъқуллади, дея хабар бермоқда Давлат солиқ қўмитаси матбуот хизмати.
Таъкидланишича, халқаро экспертлар билан узоқ муддатли ва самарали ҳамкорлик Давлат солиқ хизмати органларига касбий салоҳиятини, хусусан, рақамли трансформацияни исботлаш имконини берган.
Қайд этилишича, Жаҳон банки томонидан маъқулланган ушбу лойиҳа узоқ муддатли ҳамкорликда солиқ соҳаси ва Ўзбекистоннинг молиявий-иқтисодий салоҳиятини чуқур, профессионал таҳлил қилиш жараёнида ишлаб чиқилган.
Лойиҳа 60 миллион АҚШ доллари миқдоридаги имтиёзли кредит ҳисобига амалга оширилади. Ушбу маблағлар Ўзбекистон ҳукуматига жуда паст фоизда, 30 йилгача бўлган муддатга имтиёзли кредит шаклида тақдим этилади. Жаҳон банки гуруҳининг таркибига кирувчи Халқаро тараққиёт ассоциацияси шундай қарорга келди.
Лойиҳа операцион самарадорлик ва натижадорлик ҳамда солиқ тўловчиларга хизмат кўрсатиш сифатини оширади. Унда Давлат солиқ қўмитасининг операцион, институционал, технологик ва инсон салоҳиятини ривожлантириш ҳамда солиқ қонунчилигига риоя қилишни рағбатлантириш назарда тутилган.
Аввалроқ Жаҳон банки Ўзбекистонга шаҳарларни ривожлантириш учун 100 млн доллар ажратиши, Жаҳон банки Ўзбекистонга қарийб 300 млн долларлик имтиёзли кредит ва грант ажратиши ҳамда Япония Ўзбекистон электр энергияси соҳаси ва ижтимоий-иқтисодий тикланишига ҳисса қўшиш мақсадида 195 млн доллар миқдорида кредит ажратгани ҳақида хабар берилганди.
Изоҳ (0)