Jo Bayden va Vladimir Putinning Jenevadagi uchrashuvi AQSh uchun emas, Rossiya uchun muvaffaqiyatli bo‘ldi. Shunday bayonot bilan mamlakat sobiq prezidenti Donald Tramp Fox News telekanali efirida chiqish qildi, deb yozadi Meduza.
“Biz Rossiyaga baland minbarni taqdim etdik. Evaziga esa hech narsa olmadik, — dedi u. — Bu Rossiya uchun yaxshi kun bo‘ldi, deb o‘ylayman. Lekin bundan bizga qandaydir foyda bo‘ldi, deb o‘ylamayman”.
O‘zining Putin bilan aloqalarini esga olib, Tramp “u bilan haqiqatan yaxshi kelishgani”ni, ammo ayni vaqtda ko‘plab sanksiyalar kiritish orqali barcha Amerika yetakchilari orasida Rossiyaga nisbatan eng ko‘p qattiqqo‘llik ko‘rsatganini ta’kidladi. Biroq Trampning qayd etishicha, Rossiya “o‘zini qo‘lga olganida”, ularni shu zahoti bekor qilgan bo‘lardi, shunda ikki mamlakat o‘rtasidagi aloqalar ajoyib va o‘zaro manfaatli bo‘la olardi.
16-iyun kuni Vladimir Putin va Jo Bayden Jenevada Rossiya va Amerika prezidentlari sifatida birinchi marta uchrashuv o‘tkazdi. Sammit bir necha soat davom etdi, shundan keyin prezidentlar galma-galdan alohida-alohida matbuot anjumanlari o‘tkazdi.
Izoh (0)