Xitoyning “Shenjchou-12” boshqariluvchi kemasi ortilgan eltuvchi raketasi Xitoy Xalq Respublikasining ayni paytda qurilayotgan orbital stansiyasiga uchirildi, kema bortida uch nafar kosmonavt bor. Parvoz translyatsiyasi Xitoy Markaziy televideniyesi tomonidan namoyish etildi, deb yozadi “RBK”.
Raketa 17-iyun kuni mahalliy vaqt bilan 09:22 da (Toshkent vaqti bilan 06:22) Xitoy shimoli-g‘arbidagi Szyusyuan kosmodromidan uchirildi. Keyinroq “Shenchjou-12” kemasi Yerga yaqin orbitaga muvaffaqiyatli yetib olgani xabar berildi.
Kema stansiyaning asosiy moduliga tutashib, stansiyaning asosiy bo‘lmasi va may oxirida uchirilgan “Tyanchjou-2” yuk kemasi bilan umumiy konstruksiya hosil qilishi kerak. Shundan keyin kosmonavtlar “Tyanxe” bo‘lmasiga o‘tib, u yerda uch oy davomida atrof-muhit parametrlarini nazorat qilish, uskunalarning funksional xarakteristikalarini tekshirish, shuningdek, kemadan tashqaridagi faoliyatni amalga oshirish, shu jumladan, modul tashqarisidagi kosmik makonda ta’mirlash ishlarini bajarish bilan shug‘ullanadi. Ekipaj Yerga sentabrda qaytib keluvchi kapsula bortida yetib keladi.
“Shenjchou-12”ning uchirilishi Xitoyning 2016-yildan buyon birinchi boshqariluvchi missiyasi bo‘ldi. 2016-yil oktabrda Szyusyuan kosmodromidan bortida ikki nafar ekipaj a’zosi bo‘lgan “Shenchjou-11” boshqariluvchi kosmik kemasi uchirilgan edi.
“Tyanxe” — Xitoyning uchinchi orbital stansiyasi. Modulda kosmonavtlar yashaydi, nazorat va boshqaruv markazi ham o‘sha yerda joylashadi. Xitoyning yangi stansiyasi 2022-yilga kelib ishga tushiriladi. Bundan avvalgi orbital stansiya — “Tyangun-2” 2016-yil sentabrida, birinchisi — “Tyangun-1” esa 2011-yilda orbitaga chiqarilgan. 2019-yil martida “Tyangun-2” orbitadan olib ketilib, cho‘ktirib yuborilgan.
Izoh (0)