Ўзбекистон Олий суди 11 июнь куни Universal Packing Master ва Jemchug House қурилиш компанияларининг Тошкентнинг Бобур кўчасида жойлашган 7-уйни Моддий маданий мерос объекти рўйхатига киритиш борасидаги олдинги инстанция қарори устидан киритган кассацион шикоятини қондиришни рад этди. Бу ҳақда Makon Media’га таяниб, «Gazeta.uz» хабар берди.
Феврал ойида Тошкент туманлараро маъмурий суди йирик қурилиш компанияси бузиб ташлашга уринган Бобур кўчасидаги 7-уйга боғлиқ мунозарали иш бўйича якуний қарорни чиқарганди. Ҳал қилув қарорига кўра, аризачи Н.Юнусова ва О.Пиантковскаянинг аризаси қаноатлантирилиб, Тошкент шаҳар ҳокимининг 2007 йил 2 августдаги 697-сонли қарорининг Тошкент шаҳар Яккасарой тумани Бобур кўчаси 7-уйни маданий мерос объектлари давлат рўйхатидан чиқаришга оид қисмини ҳақиқий эмас деб топилган.
15 март куни Тошкент шаҳар маъмурий суди Universal Packing Master ва пойтахт ҳокимлигининг апелляцион шикоятини кўриб чиқмаган.
Олий суднинг З.Қурбонова, И.Алимов ва Ш.Шерқуловдан таркиб топган Суд коллегияси 11 июнь куни биринчи ва апелляция инстанциялари судларининг қарорларини ўзгаришсиз қолдириб, шаҳар аҳолиси фойдасига қарор қабул қилди.
Суд Яккасарой тумани Бобур кўчасидаги икки қаватли 7-уй Вазирлар Маҳкамасининг 2021 йил 3 мартдаги қарори билан Моддий маданий мероси кўчмас мулклари миллий рўйхатига киритилганини эслатиб ўтган.
Эслатиб ўтамиз, 2020 йилда Jemchug House таъсисчиси ва директори Тимур Тўрақулов уй маданий мерос сифатида қабул қилинадиган бўлса, Маданият вазирлигидан 10 миллиард сўм миқдорида компенсация талаб қилиши юзасидан Бош прокуратурага ариза билан мурожаат қилганди.
Изоҳ (0)