Jahongir Ortiqxo‘jayev poytaxt hokimligi huzurida boshqaruv kompaniyasi yaratishni taklif qildi

Toshkent hokimi Jahongir Ortiqxo‘jayev poytaxt hokimligi huzuridagi boshqaruv kompaniyasini yaratishni taklif etdi. Hokim bu taklifni Prezident raisligida O‘zbekistonda ko‘p qavatli turar joy binolarini qurish va ularga xizmat ko‘rsatishni takomillashtirish masalalari bo‘yicha o‘tkazilgan videoselektor yig‘ilishida bildirgan, deb xabar beradi “Gazeta.uz”.

Ma’lum qilinishicha, Toshkent hokimi boshqaruv servis kompaniyasi davlat unitar korxonasi shaklida yaratilishini ta’kidlagan. Uning so‘zlariga ko‘ra, Turkiya va boshqa mamlakatlardan 50 nafar ekspat (chet eldan taklif qilingan xodim)ni jalb etish rejalashtirilmoqda.

Jahongir Ortiqxo‘jayev boshqaruv kompaniyasiga bog‘liq tajribani Toshkentda sinab ko‘rishni, loyiha muvaffaqiyatga erishgach esa uni boshqa hududlarga joriy etishni taklif qilgan.

Shahar hokimining ma’lum qilishicha, u bu kabi boshqaruv kompaniyalari tajribasi bilan 17—18-may kunlari Qozonga amalga oshirgan tashrifi davomida tanishgan. Qozonda turar joy fondiga 118 ta boshqaruv kompaniyasi va 510 ga yaqin uy-joy mulkdorlari shirkatlari xizmat ko‘rsatadi.

Uning so‘zlariga ko‘ra, boshqaruv kompaniyasi aholiga ta’mirlash, qurilish materiallarni yetkazib erish, bolalarni parvarishlash kabi qator xizmatlarni taqdim etadi.

Yig‘ilishda davlat rahbari Uy-joy kommunal xizmat ko‘rsatish vaziri Sherzod Xidoyatovga ikki oy ichida mamlakatdagi 14 ta shaharda 1100 dan ortiq ko‘p kvartirali uylarga xizmat ko‘rsatuvchi boshqaruv kompaniyasini sinov tariqasida tanlash topshirig‘ini bergan.

Eslatib o‘tamiz, aprel oxirida Prezident Shavkat Mirziyoyev ko‘p kvartirali uylarni boshqarish tizimini takomillashtirishga oid taqdimot bilan tanishgan, may oxirlarida esa Shavkat Mirziyoyev O‘zbekistonning 14 ta shahridagi minglab ko‘p qavatli uy-joylarga xizmat ko‘rsatish boshqaruv-servis kompaniyalariga berilishini aytgan edi.