Москвада 22 июнь куни икки томонлама ҳамкорлик бўйича ҳукумат раҳбарлари даражасидаги Ўзбекистон—Россия қўшма комиссиясининг иккинчи йиғилиши бўлиб ўтади. Бу ҳақда Россиянинг Ўзбекистондаги элчиси Олег Мальгинов маълум қилди, деб хабар бермоқда «Podrobno.uz».
Унинг сўзларига кўра, Ўзбекистон—Россия бўлажак йиғилишига ҳар томонлама тайёргарлик кўриш икки мамлакат бош вазирлари музокараларининг асосий мавзуларидан бири бўлади.
«Бугунги кунда Россия ва Ўзбекистон барча йўналишларда: сиёсат ва иқтисодиётдан тортиб энергетика, таълим ва фангача икки томонлама ҳамкорликни ривожлантирмоқда. Ҳатто коронавирус пандемияси ҳам мамлакатларимиз ҳамкорлигини юқори даражага кўтариш ва алоқаларни диверсификация қилиш йўлида президентлар кўзлаган йўлга тўсиқ бўла олмади.
Бундай мураккаб шароитларда ўзаро савдо кўрсаткичларини мунтазам равишда ошириб бораётганимиз аҳамиятлидир. Хусусан, ўзаро савдо айланмаси, Ўзбекистон статистика маълумотларига кўра, 2021 йилнинг 4 ойида ўтган йилнинг шу даврига нисбатан 8,4 фоизга ўсиб, 1,8 миллиард долларни ташкил этди», — деган элчи.
Шунингдек, у 2021 йилда Ўзбекистон Президенти Шавкат Мирзиёевнинг Россияга давлат ташрифи доирасида режалаштирилган минтақалараро ҳамкорликнинг иккинчи форуми икки мамлакат ўртасидаги тўғридан-тўғри алоқаларга янги туртки беришини қўшимча қилган.
Эслатиб ўтамиз, Ўзбекистон—Россия қўшма комиссиясининг ҳукумат раҳбарлари даражасидаги биринчи йиғилиши 2019 йил май ойида бўлиб ўтганди, Ўзбекистон ва Россия ўртасида ҳудудлараро ҳамкорликнинг биринчи форуми 2018 йилда ўтказилган.
Изоҳ (0)