Jahon sog‘liqni saqlash tashkiloti (JSST) rahbari Tedros Gebreyesus COVID-19 kelib chiqishi bo‘yicha tekshiruvning ikkinchi bosqichiga tayyorgarlik ko‘rilayotganini ma’lum qildi. Gebreyesus buning uchun Xitoydan oshkoralik va hamkorlik talab etilishini aytdi.
Gebreyesusning ta’kidlashicha, virus Xitoyning Uxan shahridagi laboratoriyadan sizib chiqqani haqidagi farazlar mavzusiga 12-iyun kuni Angliyaning Karbis-Bey shahrida bo‘lib o‘tgan G7 rahbarlari sammitida to‘xtalib o‘tilgan.
Gebreyesusning so‘zlariga ko‘ra, koronavirus kelib chiqishi bo‘yicha o‘tkazilgan tekshiruvlarning birinchi bosqichidan olingan xulosalar yakuniy emas.
“To‘rtta faraz mavjud, ammo ular yakuniy emas. Menimcha, to‘rtala faraz ham muhokama qilinishi kerak. Shuningdek, koronavirus kelib chiqishining asl sababini aniqlash uchun ikkinchi bosqichga o‘tishimiz lozim”, — dedi u G7 yig‘ilishidan so‘ng jurnalistlarga.
JSST rahbari, shuningdek, dunyo bo‘ylab 174 milliondan ortiq odam koronavirusga chalinganini va 3,75 million kishi COVID-19 oqibatida vafot etganini ta’kidladi.
Odamlar virusning qayerdan kelib chiqqani haqida bilishi kerak, shunda kelajakda bu kabi pandemiyalar sodir bo‘lishining oldini olish mumkin, dedi u.
Uning so‘zlariga ko‘ra, koronavirus manbasini tekshirish bo‘yicha Xitoy bilan o‘zaro ish olib borilgan payt ma’lumotlar almashinuvida qiyinchiliklar bo‘lgan.
Eslatib o‘tamiz, JSSTning xalqaro mutaxassislar jamoasi Xitoyning Uxan shahrida to‘rt hafta mobaynida koronavirusning paydo bo‘lish sabablarini o‘rgangan edi. Ushbu safar natijalari to‘g‘risidagi hisobot JSST tomonidan 30-mart kuni e’lon qilindi. Hisobotda infeksiyaning kelib chiqishi to‘g‘risida to‘rtta ehtimoliy versiya bayon qilingan. Uxan virusologiya institutiga tashrif buyurgan mutaxassislar natijalar to‘g‘risidagi hisobotda koronavirusning institut laboratoriyasidan tarqatilganining “ehtimoli juda kam” degan xulosaga keldi.
Biroq, may va iyun oylarida Amerika ommaviy axborot vositalarida koronavirus Uxan shahridagi laboratoriyada yaratilganidan dalolat beruvchi belgilar haqida materiallar paydo bo‘la boshladi. Xabarlarga ko‘ra, olimlar SARS-CoV-2 koronavirusidan tabiiy paydo bo‘ladigan koronavirusda qayd etilmagan genetik izlarni topgan.
Shuningdek, britaniyalik va norvegiyalik olimlar COVID-19 odamlar tomonidan yaratilganiga oid dalillar borligini aytgan. Ularning fikriga ko‘ra, COVID-19 laboratoriyada yaratilgan, shundan so‘ng xitoylik olimlar “izlarni yashirish uchun” virusning ko‘rshapalaklardan kelib chiqqani to‘g‘risidagi versiyani ilgari surgan.
Izoh (0)