Moskvada koronavirusga chalinganlar ko‘payib ketgani sababli yangi cheklovlar kiritildi. COVID-bemorlar uchun kasalxonalar tayyorlanmoqda

So‘nggi bir kecha-kunduzda Moskvada COVID-19’ga chalinish bo‘yicha 6701 ta yangi holat qayd etildi. Bu haqda shaharning koronavirusga qarshi kurash tezkor shtabiga tayanib, Meduza xabar berdi.

Bu 2020-yil oxiridan buyon kunlik kasallanishning eng yuqori darajasi, so‘nggi marta bunday ko‘rsatkich 26-dekabr kuni qayd etilib, o‘shanda 7480 kishida infeksiya aniqlangan edi.

O‘tgan kun davomida Rossiyada aniqlangan COVID-19’ga chalinish holatlarining deyarli yarmi Moskva hissasiga to‘g‘ri keldi. Hammasi bo‘lib, mamlakatda  bir sutkada 13510 kishida koronavirus qayd etildi. Rossiyada o‘tgan kun davomida COVID-19 tashxisi bilan 399 kishi, xususan, Moskvada 67 kishi vafot etdi.

Moskva meri Sergey Sobyanin koronavirus bilan kasallanish ortgani sababli 2021-yil 15-iyundan 19-iyungacha ish haqi saqlanib qolgan holda, shaharda dam olish kunlari deb e’lon qildi.

“Moskvada dam olish kunlari 9 kun davom etadi — 12-iyundan 20-iyungacha”, — deyiladi Sobyanin veb-saytida.

Ishlamaydigan kunlar shahar infratuzilmasi uchun muhim bo‘lgan korxonalar, shuningdek, harbiy sanoat kompleksi, “Rosatom”, “Roskosmos” va boshqa ba’zi strategik tarmoqlardan tashqari barcha mulk shakllaridagi korxonalarga taalluqlidir.

20-iyunga qadar Moskva parklarida attraksionlar, o‘yin va sport maydonchalari, ijaraga berish punktlari, shiyponlar hamda boshqa dam olish va ko‘ngilochar muassasalar yopiq bo‘ladi. Savdo markazlarida ovqatlanish burchaklari va bolalar o‘yin xonalari ishlamaydi.

Umumiy ovqatlanish korxonalari va tungi klublarda soat 23:00 dan 6:00 gacha tashrif buyuruvchilarga xizmat ko‘rsatish taqiqlanadi (olib ketish xizmati bundan mustasno). Tungi klublarda va barlarda konsertlarga ruxsat berilmaydi.

Shuningdek, koronavirusga qarshi kurash bo‘yicha Moskva tezkor shtabining Telegram kanalida aytilishicha, 20-iyunga qadar shaxsiy xizmatlar ko‘rsatish taqiqlangan.

Sergey Sobyanin ma’lum qilishicha, Moskvada koronavirus infeksiyasining tarqalishi bilan bog‘liq vaziyatning murakkablashishi sababli shahar kasalxonalarida minglab koykalar koronavirus bemorlariga moslashtirilmoqda.

“Yirik oqimdagi bemorlarga tibbiy yordam ko‘rsatish uchun biz shahar shifoxonalarida minglab yotoqlarni qayta profillashtirishga majbur bo‘lmoqdamiz”, — deb yozadi Sobyanin o‘z veb-saytida.