Жаҳон соғлиқни сақлаш ташкилоти (ЖССТ) раҳбари Тедрос Гебрейесус COVID-19 келиб чиқиши бўйича текширувнинг иккинчи босқичига тайёргарлик кўрилаётганини маълум қилди. Гебрейесус бунинг учун Хитойдан ошкоралик ва ҳамкорлик талаб этилишини айтди.
Гебрейесуснинг таъкидлашича, вирус Хитойнинг Ухань шаҳридаги лабораториядан сизиб чиққани ҳақидаги фаразлар мавзусига 12 июнь куни Англиянинг Карбис-Бей шаҳрида бўлиб ўтган G7 раҳбарлари саммитида тўхталиб ўтилган.
Гебрейесуснинг сўзларига кўра, коронавирус келиб чиқиши бўйича ўтказилган текширувларнинг биринчи босқичидан олинган хулосалар якуний эмас.
«Тўртта фараз мавжуд, аммо улар якуний эмас. Менимча, тўртала фараз ҳам муҳокама қилиниши керак. Шунингдек, коронавирус келиб чиқишининг асл сабабини аниқлаш учун иккинчи босқичга ўтишимиз лозим», — деди у G7 йиғилишидан сўнг журналистларга.
ЖССТ раҳбари, шунингдек, дунё бўйлаб 174 миллиондан ортиқ одам коронавирусга чалинганини ва 3,75 миллион киши COVID-19 оқибатида вафот этганини таъкидлади.
Одамлар вируснинг қаердан келиб чиққани ҳақида билиши керак, шунда келажакда бу каби пандемиялар содир бўлишининг олдини олиш мумкин, деди у.
Унинг сўзларига кўра, коронавирус манбасини текшириш бўйича Хитой билан ўзаро иш олиб борилган пайт маълумотлар алмашинувида қийинчиликлар бўлган.
Эслатиб ўтамиз, ЖССТнинг халқаро мутахассислар жамоаси Хитойнинг Ухань шаҳрида тўрт ҳафта мобайнида коронавируснинг пайдо бўлиш сабабларини ўрганган эди. Ушбу сафар натижалари тўғрисидаги ҳисобот ЖССТ томонидан 30 март куни эълон қилинди. Ҳисоботда инфекциянинг келиб чиқиши тўғрисида тўртта эҳтимолий версия баён қилинган. Ухань вирусология институтига ташриф буюрган мутахассислар натижалар тўғрисидаги ҳисоботда коронавируснинг институт лабораториясидан тарқатилганининг «эҳтимоли жуда кам» деган хулосага келди.
Бироқ, май ва июнь ойларида Америка оммавий ахборот воситаларида коронавирус Ухань шаҳридаги лабораторияда яратилганидан далолат берувчи белгилар ҳақида материаллар пайдо бўла бошлади. Хабарларга кўра, олимлар SARS-CoV-2 коронавирусидан табиий пайдо бўладиган коронавирусда қайд этилмаган генетик изларни топган.
Шунингдек, британиялик ва норвегиялик олимлар COVID-19 одамлар томонидан яратилганига оид далиллар борлигини айтган. Уларнинг фикрига кўра, COVID-19 лабораторияда яратилган, шундан сўнг хитойлик олимлар «изларни яшириш учун» вируснинг кўршапалаклардан келиб чиққани тўғрисидаги версияни илгари сурган.
Изоҳ (0)