Xayrli tong, qadrli o‘quvchi! Tongni dunyo va o‘zbek sportida ro‘y bergan eng so‘nggi sport yangiliklar bilan boshlashga nima deysiz? Qani, unda ketdik!
O‘zbekiston
Futbol
Futbol bo‘yicha O‘zbekiston milliy terma jamoasi JCh—2022 musobaqasi saralashi doirasida 11-iyun, juma kuni Yaman termasiga qarshi bahs olib bordi va bazo‘r g‘alabaga erishdi. O‘yindagi yagona gol 19-daqiqada Ibrohimxalil Yo‘ldoshevga nisbatan ishlatilgan qo‘pollik sabab belgilangan penaltini aniq amalga oshirgan Jaloliddin Masharipov tomonidan urildi. Qayd etish joiz, o‘zbekistonlik futbolchilar mazkur bahsda yana bitta penalti tepish imkoniyatiga ega bo‘ldi, biroq jamoa sardori Odil Ahmedov bundan unumli foydalana olmadi.
Mazkur g‘alabadan so‘ng Vadim Abramov boshchilik qilayotgan jamoa ochkolari sonini 15 taga yetkazdi. Jamoa D guruhida Saudiya Arabistonidan (17 ochko) so‘ng ikkinchi o‘rinni egallab turibdi. So‘nggi tur o‘yini 15-iyunga belgilangan. Unda o‘zbekistonliklar mezbon va peshqadam Saudiya Arabistoni bilan bellashadi. Mazkur bahsdagi g‘alaba O‘zbekistonga guruh peshqadamligi va keyingi bosqich yo‘llanmasini taqdim etadi. To‘g‘ri, ushbu bahsdagi durang ham jamoani qanoatlantirishi mumkin, biroq buning uchun parallel guruhlarda Livan Janubiy Koreyaga yutqazishi, Iordaniya esa Avstraliya bilan o‘yinda g‘alaba qozonmasligi kerak bo‘ladi. Agar mag‘lubiyat bo‘lsa... keling, shunday bo‘lmay qo‘ya qolsin. Matematikaga keyinroq qaytganimiz ma’qul.
Boks
Professional boksda mag‘lubiyatsiz odimlayotgan Shohjahon Ergashev (19-0, 17 KO) Toshkentdagi shou-kechada ishtirok etdi. Uning raqibi esa Tanzaniya (bilmaganlar uchun bu uzoq Afrika sharqidagi mamlakatdir) vakili Salimu Jengo bo‘ldi. Jangga deyarli hech qanday ahamiyatga ega bo‘lmagan EBP kamari qo‘yilgandi. Kutilganidek jang 1 raund ham davom etmadi. Referi avvaliga Jengoning nokdaun bo‘lganini qayd etdi, ammo birdan jangni to‘xtatib, afrikalik bokschining texnik nokautini qayd etdi. Jengo bundan qattiq norozi bo‘ldi, xuddi 60 ming so‘mdan 400 ming so‘mgacha chipta sotib olib, jang ko‘ramiz deb Yunusobod sport kompleksiga kelgan muxlislar kabi. Hatto Shohjahonning o‘zi ham g‘alaba qozonganiga qaramay norozilik bildirdi. Nima bo‘lganda ham Toshkent yana bir shouga mezbonlik qildi. Buni e’tirof etmay iloj yo‘q. Aytgancha, agar bu boks oqshomida Shohjahondan boshqa bokschilar ham jang qildi. Ular kim deya savol bermoqchi bo‘lsangiz, quyidagi havola orqali janglar haqida o‘zingiz o‘qib olarsiz — batafsil.
Dunyo
Futbol
Koronavirus pandemiyasi sabab bir yilga kechiktirilgan Yevro—2020 (ha, musobaqa 2021-yilda bo‘lsa ham nomi o‘zgarmadi) musobaqasiga 11-iyun, juma kuni Turkiya—Italiya uchrashuvi bilan start berildi.
Yevro—2020 ning ochilish marosimida italiyalik noyob iste’dod sohibi Andrea Bochelli chiqish qildi. U Jakomo Puchchini muallifligidagi “Turandot” operasi so‘nggi aktidan Nessun dorma (“Mayli, hech kim uxlamasin”) ariyasini ijro qildi. Bochelli mazkur kompazitsiyani “Lester” klubi 2016-yil Angliya chempionligini qo‘lga kiritganda kuylagan edi.
Rimdagi ochilish o‘yini italiyaliklarning ustunligida o‘tdi. Birinchi bo‘limda hisob ochilmagan bo‘lsa, ikkinchisida naq uchta gol urildi. Avvaliga Merih Demiral italiyalik muxlislarning “yoqimtoyi” ekanligini isbotladi. “Yuventus” futbolchisi 53-daqiqada avtogol sohibiga aylandi. 66-daqiqada so‘nggi yillarda to‘purarlik salohiyatiga yaxshigina sayqal bera olgan Chiro Immobile italyanlarning hisobdagi ustunligini oshirdi. O‘yinga yakuniy nuqtani esa neapollik Lorenso Insinye qo‘ydi.
Rekordchi Kyellini va Donnarumma
Italiyaliklar safida 36 yoshli Jorjio Kyellini maydonga tushdi. Bu uning uchun hisob bo‘yicha to‘rtinchi Yevropa chempionati bo‘ldi. Natijada “Yuve” vakili terma jamoaning sobiq a’zolari Janluiji Buffon va Alessandro del Pyerolarning rekordini takrorladi. Kyellini bungcha 2008, 2012 hamda 2016-yillarda Yevropa chempionatida Italiya sharafini himoya qilgan edi.
Turklarga qarshi bahsda Italiya darvozasini “Milan”dan ketishi kutilayotgan Janluiji Donnarumma qo‘riqladi. U bu ishni 22 yosh 106 kunligida bajardi. Shu tariqa kichik Jiji “skuadra azurra” darvozasini katta musobaqalarda (Yevro va JCh) qo‘riqlagan eng yosh posbonga aylandi. Avvalgi rekord Jorjio Getssiga tegishli edi (23 yosh 342 kunlik). Ma’lumot uchun, afsonaviy Janluiji Buffon Italiya milliy jamoasi safida 24 yosh 126 kunlik vaqtida debyut qilgandi.
To‘p o‘tkazmasdan g‘alaba qozonishni odat qilayotgan Italiya
Roberto Manchini shogirdlari Turkiya bilan o‘yinni qo‘shib hisoblasa, ketma-ket 9 ta o‘yinda g‘alaba qozondi va ularning hech birida o‘z darvozasidan bitta ham to‘p o‘tkazmadi. Bunday natija Italiya terma jamoasi tarixida ilk bor ro‘y berdi. Qayd etish joiz, italiyaliklar ketma-ket 28 ta o‘yindan beri mag‘lubiyat nimaligini bilmay kelmoqda. Bu milliy jamoa tarixidagi ikkinchi eng yaxshi natija hisoblanadi. Mutlaq rekord esa 30 ta o‘yindan iborat.
Shuningdek, Italiya Yevropa chempionatlari tarixida bir o‘yinda ilk bor 3 ta gol urdi. Bundan tashqari avvalgi Yevrolardagi ochilish o‘yinlarida hech qachon 3:0 hisobi qayd etilmagandi.
Katta musobaqalardagi ilk o‘yinlarni boy berib qo‘yayotgan Turkiya
Turkiya so‘nggi Yevropa va Jahon Chempionatlari doirasida o‘zining musobaqadagi ilk o‘yinini yettinchi marta boy berdi. Turklar bu borada yagona terma jamoa bo‘lib turibdi.
UEFA prezidenti navbatdagi Yevropa chempionatini bir nechta mamlakatida qilmoqchi emas
“Biz Yevro startidan xursandmiz. Bu tunnel ortidan yorug‘likning ko‘rinishidir. Futbol muxlislarga umid baxshida etadi. Mana shu narsa biz uchun juda muhim.
Ushbu musobaqani bir necha mamlakatlarda o‘tkazish g‘oyasiga keladigan bo‘lsak, men buni qo‘llab-quvvatlamayman. Yaqin orada yana shunday qilamiz deb ham o‘ylamayman”, — deydi UEFA prezidenti Aleksandr Cheferin.
Ma’lumot uchun, Yevro—2020 musobaqasi tarixda ilk bor Yevropaning 11 ta davlatida o‘tkazilmoqda.
Bizda hozircha shular, nasib etsa kechroq yana bir g‘oyibona diydorlashamiz!
Izoh (0)