O‘zaro o‘yinlarda g‘alaba qozonmagan Turkiya yengilmas Italiyaga qarshi. Uzoq kutilgan Yevro—2020 musobaqasi bugun boshlanadi (prevyu)

Yevro—2020 musobaqasining dastlabki o‘yini Rim shahrida bo‘lib o‘tadi. A guruhi vakillari — Turkiya va Italiya o‘zaro bahs olib boradi. Quyida mazkur uchrashuvga oid ma’lumotlar va qiziqarli faktlar taqdim etiladi.

Turkiya Yevro—2020 ning kashfiyoti bo‘ladimi?

“Qotil-mashina”, “musobaqa kashfiyoti”. Shu va shunga o‘xshash nomlar har bir musobaqada terma jamoalarga tamg‘a sifatida yopishtiriladi. Oxirgi sanaganimiz esa Turkiya terma jamoasiga mos keladi. Ushbu terma jamoa futbolchilari Yevropaning yetakchi jamoalarida to‘p suradi. Jumladan, Yusuf Yaziji, Zeki Chelik, Burak Yilmaz “Lill” safida Fransiya chempionligini qo‘lga kiritdi.

Italiyaga qarshi bahs haqida nima deyish mumkin? Turkiya terma jamoasining murabbiyi Shenol Gyunesh taktik jihatdan kuchli murabbiylar sirasiga kiradi. Bu o‘yin A guruhi yetakchisi bo‘lishga asosiy da’vogarni aniqlab berishini hisobga olsak, Gyunesh Italiyaga qarshi jiddiy tayyorgarlik ko‘rgani aniq.

Turkiya “ikkinchi raqam” ostida yaxshi harakat qiladi. Niderlandiyaga qarshi mundial saralash o‘yinidagi g‘alaba shu tarzda qo‘lga kiritildi. Norvegiyaga qarshi bahsda ham Turkiya “ikkinchi raqamli jamoa” bo‘lib harakat qildi. Ikkala o‘yinda ham Turkiya o‘yin boshida gol urib olgan va qolgan vaqtda qarshi hujumlarga tayanib harakat qilgan.

Italiya. O‘z uyingda devorlar ham yordam beradimi?

Rimda joylashgan “Olimpiko” stadioniga 17,5 ming muxlis tashrif buyurishiga ruxsat bor. Italiya terma jamoasini o‘z uyida qo‘llab-quvvatlovchi muxlislar yig‘iladi. Turkiya ushbu o‘yinda nominal mezbon sifatida harakat qilsa ham, o‘yin Rimda bo‘lib o‘tayotganini hisobga olsak, Italiya o‘zini haqiqiy mezbon sifatida his qiladi.

Italiya saralash bosqichini 100 foizlik natija bilan yakunlaganini unutmaslik kerak. Manchini shogirdlari oxirgi marta 2018-yil oktabr oyida Millatlar Ligasi yarim finalida Portugaliyaga mag‘lub bo‘lgandi. Shundan buyon italyanlar birorta o‘yinda mag‘lubiyat nimaligini bilmay kelyapti.

O‘zaro o‘yinlar tarixi

Turkiya va Italiya shu paytgacha o‘zaro 14 marta to‘qnash kelgan va 10 ta o‘yinda Italiya g‘alaba qozongan 4 ta durang qayd etilgan. Turkiya hali biror marotaba g‘alaba qozonmagan.

O‘zaro o‘yinlar tarixidagi eng yirik hisob 1964-yilgi Olimpiada saralashi doirasidagi o‘yinda qayd etilgan. Italyanlar 7:0 hisobida raqibidan ustun kelgan.

Jamoalar o‘rtasidagi eng oxirgi o‘yin 2006-yil 15-noyabrda bo‘lib o‘tgan. Italiya va Turkiya o‘rtasida bo‘lib o‘tgan ushbu bahsda 1:1 hisobi qayd etilgan.

Murabbiylarning o‘yin oldi fikrlari

O‘yin texnik, taktik va fizik jihatdan yuqori darajada bo‘ladi, deb o‘ylayman. Biz ehtiyot bo‘lishimiz kerak. Aks holda Italiya o‘yinni qanday borishini nazorat qiladi. Bir lahza ham diqqatni chalg‘itmasligimiz zarur. Juda qiyin guruhga tushgan bo‘lsak ham pley-off bosqichiga chiqish bizning asosiy vazifamiz. O‘ylaymanki, Yevro—2020 finalida Italiyaga qarshi bahs olib boramiz.Shenol Gyunesh, Turkiya terma jamoasi bosh murabbiyi

Hozircha asosiy tarkib bo‘yicha yakuniy qarorga kelganim yo‘q. O‘rganib chiqish kerak bo‘lgan narsalar bor, lekin barcha futbolchilarning diqqati jamlangan.Turkiya terma jamoasiga hurmat bilan muomala qilishimiz lozim. Turkiya iqtidorli futbolchilarga boy jamoa. Ochilish o‘yinlari doim qiyin kechadi. Muxlislarga quvonch bag‘ishlaydigan o‘yin ko‘rsatish kerak. Bu bizning asosiy maqsadimiz. Bor kuchimiz bilan harakat qilamiz. Barcha o‘ylardan xalos bo‘lgan holda, diqqatni o‘yinga qaratishimiz kerak.

Roberto Manchini, Italiya terma jamoasi bosh murabbiyi

Taxminiy tarkiblar:

Turkiya: Ug‘urjan Chaqir; Zeki Chelik, Merix Demiral, Chag‘lar So‘yunjyu, Umut Merash; Okay Yokushlu, Ozan Tufan, Xoqon Chalxono‘g‘lu, Yusuf Yaziji; Kenan Karaman, Burak Yilmaz.

Italiya: Janluiji Donnarumma; Alessandro Florensi, Leonardo Bonuchchi, Jorjio Kyellini, Leonardo Spinatssola; Nikolo Barella, Jorjinyo, Manuel Lokatelli; Domeniko Berardi, Chiro Immobile, Lorenso Insinye.