Яманни «ёмон қилган» Ўзбекистон, ҳакамлардан хафа Шоҳжаҳон, Туркияни таслим қилган Италия. Энг сўнгги спорт хабарлари дайжести

Хайрли тонг, қадрли ўқувчи! Тонгни дунё ва ўзбек спортида рўй берган энг сўнгги спорт янгиликлар билан бошлашга нима дейсиз? Қани, унда кетдик!

Ўзбекистон

Футбол бўйича Ўзбекистон миллий терма жамоаси ЖЧ—2022 мусобақаси саралаши доирасида 11 июнь, жума куни Яман термасига қарши баҳс олиб борди ва базўр ғалабага эришди. Ўйиндаги ягона гол 19-дақиқада Иброҳимхалил Йўлдошевга нисбатан ишлатилган қўполлик сабаб белгиланган пенальтини аниқ амалга оширган Жалолиддин Машарипов томонидан урилди. Қайд этиш жоиз, ўзбекистонлик футболчилар мазкур баҳсда яна битта пенальти тепиш имкониятига эга бўлди, бироқ жамоа сардори Одил Аҳмедов бундан унумли фойдалана олмади.

Мазкур ғалабадан сўнг Вадим Абрамов бошчилик қилаётган жамоа очколари сонини 15 тага етказди. Жамоа D гуруҳида Саудия Арабистонидан (17 очко) сўнг иккинчи ўринни эгаллаб турибди. Сўнгги тур ўйини 15 июнга белгиланган. Унда ўзбекистонликлар мезбон ва пешқадам Саудия Арабистони билан беллашади. Мазкур баҳсдаги ғалаба Ўзбекистонга гуруҳ пешқадамлиги ва кейинги босқич йўлланмасини тақдим этади. Тўғри, ушбу баҳсдаги дуранг ҳам жамоани қаноатлантириши мумкин, бироқ бунинг учун параллел гуруҳларда Ливан Жанубий Кореяга ютқазиши, Иордания эса Австралия билан ўйинда ғалаба қозонмаслиги керак бўлади. Агар мағлубият бўлса... келинг, шундай бўлмай қўя қолсин. Математикага кейинроқ қайтганимиз маъқул. 

Бокс

Профессионал боксда мағлубиятсиз одимлаётган Шоҳжаҳон Эргашев (19-0, 17 КО) Тошкентдаги шоу-кечада иштирок этди. Унинг рақиби эса Танзания (билмаганлар учун бу узоқ Африка шарқидаги мамлакатдир) вакили Салиму Женго бўлди. Жангга деярли ҳеч қандай аҳамиятга эга бўлмаган EBP камари қўйилганди. Кутилганидек жанг 1 раунд ҳам давом этмади. Рефери аввалига Женгонинг нокдаун бўлганини қайд этди, аммо бирдан жангни тўхтатиб, африкалик боксчининг техник нокаутини қайд этди. Женго бундан қаттиқ норози бўлди, худди 60 минг сўмдан 400 минг сўмгача чипта сотиб олиб, жанг кўрамиз деб Юнусобод спорт комплексига келган мухлислар каби. Ҳатто Шоҳжаҳоннинг ўзи ҳам ғалаба қозонганига қарамай норозилик билдирди. Нима бўлганда ҳам Тошкент яна бир шоуга мезбонлик қилди. Буни эътироф этмай илож йўқ. Айтганча, агар бу бокс оқшомида Шоҳжаҳондан бошқа боксчилар ҳам жанг қилди. Улар ким дея савол бермоқчи бўлсангиз, қуйидаги ҳавола орқали жанглар ҳақида ўзингиз ўқиб оларсиз — батафсил.

Дунё

Коронавирус пандемияси сабаб бир йилга кечиктирилган Евро—2020 (ҳа, мусобақа 2021 йилда бўлса ҳам номи ўзгармади) мусобақасига 11 июнь, жума куни Туркия—Италия учрашуви билан старт берилди.

Евро—2020 нинг очилиш маросимида италиялик ноёб истеъдод соҳиби Андреа Бочелли чиқиш қилди. У Жакомо Пуччини муаллифлигидаги «Турандот» операси сўнгги актидан Nessun dorma («Майли, ҳеч ким ухламасин») ариясини ижро қилди. Бочелли мазкур компазицияни «Лестер» клуби 2016 йил Англия чемпионлигини қўлга киритганда куйлаган эди.

Римдаги очилиш ўйини италияликларнинг устунлигида ўтди. Биринчи бўлимда ҳисоб очилмаган бўлса, иккинчисида нақ учта гол урилди. Аввалига Мериҳ Демирал италиялик мухлисларнинг «ёқимтойи» эканлигини исботлади. «Ювентус» футболчиси 53-дақиқада автогол соҳибига айланди. 66-дақиқада сўнгги йилларда тўпурарлик салоҳиятига яхшигина сайқал бера олган Чиро Иммобиле итальянларнинг ҳисобдаги устунлигини оширди. Ўйинга якуний нуқтани эса неаполлик Лоренцо Инсинье қўйди.

Рекордчи Кьеллини ва Доннарумма

Италияликлар сафида 36 ёшли Жоржио Кьеллини майдонга тушди. Бу унинг учун ҳисоб бўйича тўртинчи Европа чемпионати бўлди. Натижада «Юве» вакили терма жамоанинг собиқ аъзолари Жанлуижи Буффон ва Алессандро дел Пьероларнинг рекордини такрорлади. Кьеллини бунгча 2008, 2012 ҳамда 2016 йилларда Европа чемпионатида Италия шарафини ҳимоя қилган эди.

Туркларга қарши баҳсда Италия дарвозасини «Милан»дан кетиши кутилаётган Жанлуижи Доннарумма қўриқлади. У бу ишни 22 ёш 106 кунлигида бажарди. Шу тариқа кичик Жижи «скуадра азурра» дарвозасини катта мусобақаларда (Евро ва ЖЧ) қўриқлаган энг ёш посбонга айланди. Аввалги рекорд Жоржио Геццига тегишли эди (23 ёш 342 кунлик). Маълумот учун, афсонавий Жанлуижи Буффон Италия миллий жамоаси сафида 24 ёш 126 кунлик вақтида дебют қилганди.

Тўп ўтказмасдан ғалаба қозонишни одат қилаётган Италия

Роберто Манчини шогирдлари Туркия билан ўйинни қўшиб ҳисобласа, кетма-кет 9 та ўйинда ғалаба қозонди ва уларнинг ҳеч бирида ўз дарвозасидан битта ҳам тўп ўтказмади. Бундай натижа Италия терма жамоаси тарихида илк бор рўй берди. Қайд этиш жоиз, италияликлар кетма-кет 28 та ўйиндан бери мағлубият нималигини билмай келмоқда. Бу миллий жамоа тарихидаги иккинчи энг яхши натижа ҳисобланади. Мутлақ рекорд эса 30 та ўйиндан иборат.

Шунингдек, Италия Европа чемпионатлари тарихида бир ўйинда илк бор 3 та гол урди. Бундан ташқари аввалги Евролардаги очилиш ўйинларида ҳеч қачон 3:0 ҳисоби қайд этилмаганди.

Катта мусобақалардаги илк ўйинларни бой бериб қўяётган Туркия

Туркия сўнгги Европа ва Жаҳон Чемпионатлари доирасида ўзининг мусобақадаги илк ўйинини еттинчи марта бой берди. Турклар бу борада ягона терма жамоа бўлиб турибди.

УЕФА президенти навбатдаги Европа чемпионатини бир нечта мамлакатида қилмоқчи эмас

«Биз Евро стартидан хурсандмиз. Бу туннел ортидан ёруғликнинг кўринишидир. Футбол мухлисларга умид бахшида этади. Мана шу нарса биз учун жуда муҳим.

Ушбу мусобақани бир неча мамлакатларда ўтказиш ғоясига келадиган бўлсак, мен буни қўллаб-қувватламайман. Яқин орада яна шундай қиламиз деб ҳам ўйламайман», — дейди УЕФА президенти Александр Чеферин.

Маълумот учун, Евро—2020 мусобақаси тарихда илк бор Европанинг 11 та давлатида ўтказилмоқда.

Бизда ҳозирча шулар, насиб этса кечроқ яна бир ғойибона дийдорлашамиз!