Chiroqchida aholining temiryo‘lni to‘sib qo‘yishiga elektr ta’minotidagi cheklov sabab bo‘lgani ma’lum qilindi

Qashqadaryo viloyatining Chiroqchi tumanida hokim va’dasini bajarmagani uchun aholi “Afrosiyob” poyezdi yo‘lini to‘sib qo‘ygani haqida xabar berilgan edi. Mazkur voqea sababini o‘rgangan “Hududiy elektr tarmoqlari” AJ axborot xizmatining “Daryo”ga ma’lum qilishicha, aholining temiryo‘lni to‘sib qo‘yishiga elektr ta’minotidagi cheklov sabab bo‘lgan.

Ma’lumki, Chiroqchi tumanining Ayritom, Paxtalisoy, Eski Anhor qishloqlariga 35/10 kV li ‘Istiqbol’ nimstansiyasidan chiquvchi ‘Obodon’ fideridan elektr ta’minoti yetkazib beriladi. So‘nggi kunlarda havoning keskin isib ketishi iste’molchilar tomonidan elektr energiyasini nafaqat maishiy ehtiyojlar, balki tomorqalaridagi dehqonchilik ekinlarini nobud bo‘lishidan asrash uchun sug‘orish nasoslaridan ko‘proq foydalanishga majbur qildi. Bu esa, o‘z navbatida, 35/10 ‘Istiqbol’ nimstansiyasidagi 6300 kV li transformatorning zo‘riqish bilan ishlashiga olib keldi. Bunday vaziyatda, ya’ni elektr tarmoqlarining shikastlanishi va ishdan chiqishining oldini olishga qaratilgan choralar ko‘rish maqsadga muvofiq bo‘lib, tezkor dispetcherlik xodimlari tomonidan cheklovlar kiritilgan.

Hozirgi kunda qurilmalarni saqlab qolish, shikastlanishining oldini olish hamda iste’molchilarga uzluksiz elektr energiyasi yetkazib berish uchun ‘Qashqadaryo hududiy elektr tarmoqlari’ AJ xodimlari tomonidan 35/10 kV li ‘Istiqbol’ nimstansiyasiga qo‘shimcha 4000 kV li transformator o‘rnatildi hamda Ayritom, Paxtalisoy, Eski Anhor, Sho‘rbozor, Taloqtepa qishloqlari iste’molchilarining elektr ta’minoti to‘liq tiklandi.

“Hududiy elektr tarmoqlari” AJ matbuot xizmati