Surxondaryo viloyati Jarqo‘rg‘on tumanida yashovchi erkak onasi bilan tortishib, uni armatura bilan kaltakladi, deya xabar bermoqda viloyat IIB.
Ma’lum qilinishicha, Jarqo‘rg‘on tumani “Xo‘jaqishloq” mahallasida yashovchi Sh.J. spirtli ichimlik iste’mol qilishga ruju qo‘yib, oila a’zolari bilan uy-joy masalasida davom etib kelayotgan nizosi sababli 2021-yil 11-iyun kuni soat 14:30 larda mast holatda uyiga borib, o‘zi bilan birgalikda istiqomat qiluvchi onasi Sh.R. bilan tortishib qolib, qo‘lidagi armatura bilan onasi Sh.R.ni urib, boshqalarni ham “o‘ldiraman” deb, janjal qiladi.
Fuqaro Sh.R. janjalni tinchitish va o‘g‘li Sh.J.ga chora ko‘rish maqsadida Jarqo‘rg‘on tumani IIB HPB profilaktika inspektorlariga telefon qilib, ularni uyiga chaqiradi.
2021-yil 11-iyun kuni soat 17:00 larda Jarqo‘rg‘on tumani IIB HPB profilaktika inspektorlari Sh.R.ning uyiga borib, Sh.J.ning yonida olib yurgan pichog‘ini olib qo‘yib, Sh.J.ni tinchlantirish uchun yaqin qarindoshi Q.Sh.ga topshiradi.
Shu kuni soat 23:00 larda Sh.R. Jarqo‘rg‘on tuman IIBga telefon orqali murojaat qilib, Sh.J. do‘konga borib fuqarolar bilan janjallashayotganini bildiradi. Jarqo‘rg‘on tumani IIB 3-sonli IIB boshlig‘i, HPB profilaktika inspektorlari Jarqo‘rg‘on tumani “Mingchinor” mahallasida joylashgan do‘kon yoniga borib, Sh.J. fuqarolar bilan tortishayotgani sababli 3-sonli IIB binosiga olib borishadi.
Fuqaro Sh.J. Ichki ishlar bo‘limi xodimlarining qonuniy talablariga bo‘ysunmagani va qarshilik ko‘rsatgani sababli spirtli ichimlik iste’mol qilgan yoki qilmaganini tekshirish maqsadida tuman tibbiyot birlashmasi narkolog xonasiga olib borilib, tan jarohatlari va spirtli ichimlik iste’mol qilganligi holati yuzasidan tekshiruvdan o‘tkazilgan. Shundan so‘ng u tuman IIB binosiga olib kelingan va fuqarolarni ro‘yxatga olish kitobiga qayd etilib, so‘rov-suhbat xonasida profilaktik suhbat o‘tkazilib, yashash manziliga ketishi uchun javob berilgan.
Fuqaro Sh.J.ga nisbatan ichki ishlar organlari xodimlari tomonidan biror-bir tan jarohati yetkazish holati bo‘lmagan.
Fuqaro Sh.J. 2021-yil 11-iyun kuni spirtli ichimlik iste’mol qilib, fuqarolarning tinchligini buzganligi va ichki ishlar organlari xodimlarining qonuniy talablarini bajarmagani holati yuzasidan Jarqo‘rg‘on tumani IIB Huquqbuzarliklar profilaktikasi bo‘limi tomonidan tergovga qadar tekshiruv harakatlari olib borilayotgani ma’lum bo‘ldi.
Avval Toshkentda imkoniyati cheklangan qizni kaltaklagan ayol qilmishidan pushaymonligini aytib, uzr so‘ragani, Jizzaxda qariyb 300 mln so‘m qarzini to‘lamay kelgan fuqaro MIB xodimlarini kaltaklagani hamda Boysunda XDP deputati noma’lum shaxslar tomonidan kaltaklangani haqida xabar berilgandi.
Izoh (0)