Poytaxtning sobiq hokimi Rahmonbek Usmonov Toshkent metropoliteniga rahbar etib tayinlandi

Toshkent metropoliteniga yangi rahbar tayinlandi, deya xabar qilmoqda Transport vazirligi.

Qayd etilishicha, “O‘zbekiston temir yo‘llari” yagona aksiyadori qarori bilan Usmonov Rahmonbek Jahongirovich “O‘zbekiston temir yo‘llari” boshqaruv raisi o‘rinbosari – “Toshkent metropoliteni” boshlig‘i etib tayinlandi.

Ma’lumot uchun, Rahmonbek Usmonov 1960-yili Toshkent shahrida tug‘ilgan. 1982-yili Toshkent avtomobil yo‘llari institutini tamomlagan.

U 2011–2012-yillarda Toshkent shahri hokimi vazifasini bajaruvchi, 2012–2018-yillarda esa Toshkent shahri hokimi lavozimida ishlagan. Bundan tashqari, hokim 2018-yil apreldan oktabrgacha O‘zbekiston avtomobil transporti agentligi rahbarining birinchi o‘rinbosari, 2018-yil oktabridan Toshkent shahrining Yunusobod tumani hokimi sifatida ishlagan.

Usmonov 2021-yil yanvar oyida transport vaziri o‘rinbosari etib tayinlandi va bu lavozimda 2021-yil 10-iyungacha ishladi.