Jizzaxda shahar hokimining qaroriga viloyat prokuraturasi tomonidan keltirilgan protestni tanishlari orqali 2,5 ming dollar evaziga bekor qildirishni va’da qilgan shaxs ushlandi. Bu haqda Bosh prokuratura huzuridagi departament matbuot xizmati xabar berdi.
Ma’lum qilinishicha, Bosh prokuratura huzuridagi departament hamda DXXning Jizzax viloyati boshqarmalari tomonidan viloyat prokuraturasi bilan hamkorlikda tezkor tadbir o‘tkazilgan. Tadbirda fuqaro Sh.B. noqonuniy daromad orttirish maqsadida fuqaro B.ning ishonchiga kirib, unga Jizzax shahar hududida xususiy ta’lim muassasasi qurish uchun 20 sotix yer maydoni ajratish haqidagi shahar hokimi qaroriga Jizzax viloyat prokuraturasi tomonidan keltirilgan protestni tanishlari orqali bekor qildirib, uning nomiga qayta hujjatlashtirib berishni va’da qilgan.
Sh.B. “o‘z xizmati” uchun 2,5 ming dollar talab qilib, shundan avans tariqasida 5 million so‘mini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Ma’lumot uchun, O‘zbekiston Prezidentining 2021-yil 8-iyundagi “Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi farmoniga asosan, qishloq xo‘jaligiga mo‘ljallangan yerlar ochiq elektron tanlov yakunlariga ko‘ra, faqat ijara huquqi asosida ajratiladi, qishloq xo‘jaligiga mo‘ljallanmagan yerlar mulk huquqi va ijara huquqi asosida elektron onlayn auksion orqali realizatsiya qilinadi.
Avvalroq Toshkentda yer olib berishni va’da qilib, fuqarodan 52 800 dollar olgan shaxs ushlangani, Andijonda 100 gektar yer ajratib berish evaziga 128 ming dollar pora olgan mansabdor shaxslarga sud hukmi o‘qilgani, senatorlar Toshkent viloyatida Yer kodeksi talablari bajarilmayotganiga oid holatlarni aniqlagani to‘g‘risida xabar berilgandi.
Izoh (0)