Berdimuhamedov yangi ofisida agrosanoat masalalari bo‘yicha videokonferensiya o‘tkazdi

Turkmaniston prezidenti Gurbanguli Berdimuhamedov 9-iyun kuni qishloq xo‘jaligi masalalari bo‘yicha videokonferensiya o‘tkazdi. Bu haqda Turkmaniston davlat axborot agentligiga tayanib “Xronika Turkmenistana” xabar berdi.

Telereportaj kadrlariga qaraganda, davlat rahbari yig‘ilishni futuristik uslubda qurilgan yangi ofisidan turib o‘tkazgan.

Yig‘ilishda bosh vazirning agrosanoat kompleksiga mas’ul o‘rinbosari Esenmirat Orazgeldiyev Berdimuhamedovga ipak qurti pillalarini yetishtirish bo‘yicha 2100 tonnalik reja bajarilgani to‘g‘risida hisobot berdi hamda “qishloq xo‘jaligi ishchilarining samarali mehnat qilishiga yaratilgan sharoitlar uchun Turkmaniston rahbariga minnatdorlik bildirdi”.

Berdimuhamedov bosh vazir o‘rinbosariga pilla ishlab chiqaruvchilarga ish haqini o‘z vaqtida to‘lashni va respublikaning barcha hududlarida tut ko‘chatlarini ekishni buyurdi.

Gazeta qayd etishicha, pillalarning monopol xaridori sifatida davlat sotib olish narxlarni belgilaydi. Bu yil pilla yetishtiruvchilarga bir kilogramm uchun 25 manatdan ( 0,7 dollar) to‘lashga va’da berilgan.

Bunday narxlarda pilla yetishtirish foyda keltirmaydi va buni amalga oshirishni istagan ko‘ngillilar yo‘q. Shu munosabat bilan qishloq xo‘jaligi yerlari ijarachilari va qishloq maktablari xodimlari ipak qurti yetishtirishga majburiy jalb qilingan. Aholi ipak qurti uchun yagona oziqa bo‘lgan tut barglari taqchilligidan shikoyat qilmoqda, deb yozadi gazeta.

Yig‘ilishda prezident bir qat0r viloyatlar hokimlariga bug‘doy o‘rimini qat’iy nazoratga olishni buyurdi. Axal viloyati rahbari bug‘doy yig‘imi bo‘yicha rejaning to‘rtdan biri bajarib bo‘lingani haqida hisobot berdi.

Rejadan eng orqada qolgan Tejen etrapi esa rejalashtirilgan hosilning 21,7 foizi yig‘ilganini ma’lum qildi. Bunga javoban, prezident etrap hokimiga yig‘im vaqtida shaxsan dalaga borishni va shu tariqa “o‘rim tezligini oshirishni ta’minlashni” buyurdi.