Turkmaniston prezidenti Gurbanguli Berdimuhamedov Butunjahon velosiped kuni munosabati bilan ommaviy velomarafonda ishtirok etdi, deb yozmoqda “Xronika Turkmenistana”.
Start chizig‘ida bosh vazir o‘rinbosarlari, Majlis rahbari, harbiy va huquqni muhofaza qiluvchi organlar, vazirliklar va idoralar, shuningdek, prezident tomonidan sovg‘a qilingan velosipedlarni minib olgan bolalar uyi tarbiyalanuvchilari davlat rahbarini kutib oldi.
Velomarafon davomida prezident vazirning qurilish-sanoat kompleksi bo‘yicha o‘rinbosari Shamuhammet Durdiliyevga va Ashxobod meri Yaztagan Gilijovga bog‘lar va maydonlarni hozirgi holatda saqlash, shuningdek, fuqarolarning turmush darajasini yaxshilash bo‘yicha ko‘rsatmalar berdi.
“Gurbanguli Berdimuhamedov doimgidek ajoyib jismoniy holatda ekanini namoyish etdi. Ish jadvalining juda tig‘iz ekaniga qaramay, prezident doimiy ravishda jismoniy tarbiya va turli sport turlari bilan shug‘ullanish uchun vaqt ajratadi”, — deb yozmoqda TDX.
Davlat rahbari velomarafonni hukumat binosining yonida, qolgan ishtirokchilar esa “Oq shahar — Ashxobod” yodgorligi yonida yakuniga yetkazdi.
TDX ma’lumotlariga ko‘ra, mamlakatning barcha viloyatlarida velomarafon o‘tkazildi. Tadbir munosabati bilan poytaxtda markaziy ko‘chalar yopildi, lekin ularning yopilishi haqida hatto avtobus haydovchilari ham oldindan ogohlantirilmadi va ular mustaqil ravishda yo‘l izlashga majbur bo‘ldi. Yo‘llarda katta tirbandlik hosil bo‘ldi.
Avvalroq Berdimuhamedov raisligida 2-may kuni Davlat xavfsizlik kengashining yig‘ilishi bo‘lib o‘tgani haqida xabar berildi. Majlisda bosh vazirning xavfsizlik masalalari bo‘yicha o‘rinbosari Chorimurat Amanov harbiy islohotni amalga oshirish, shuningdek, harbiy xizmatchilar va ularning oilalarini ijtimoiy ta’minlash masalalarini hal qilish to‘g‘risida hisobot berdi. Hisobotni eshitgandan so‘ng prezident Amanovga “xizmat vazifalarini noto‘g‘ri bajargani, bo‘ysunuvchi muassasalar faoliyati ustidan nazoratni susaytirgani uchun kamchiliklarni iloji boricha tezroq tuzatish to‘g‘risida so‘nggi ogohlantirish bilan” qattiq tanbeh berdi.
Shuningdek, Turkmanistonda oziq-ovqat do‘konlarida navbatga turish taqiqlangani, chunki bu prezidentning “imijiga salbiy ta’sir qilishi” haqida xabar berilgandi. Turkmaniston savdo ishlari bo‘yicha bosh vaziri o‘rinbosari Chori Gilijov 30-aprel kuni bo‘lib o‘tgan Vazirlar Mahkamasi majlisida prezident Gurbanguli Berdimuhamedovga ichki bozor mahalliy mahsulotlar bilan to‘liq ta’minlangani to‘g‘risida hisobot bergan.
Bundan tashqari, Turkmaniston prezidenti ikkinchi sun’iy yo‘ldoshni uchirishni va yuk samolyotlari sotib olishni buyurgani, sanoat sektori ishini tanqid qilib, “Turkmanximiya” rahbariga qattiq tanbeh bergani hamda olimlarga kartoshka hosildorligini oshirishni buyurgani haqida xabar berilgan.