Toshkentda YXHBB xodimlari tomonidan gaz balloni o‘rnatilgan transport vositalarini tekshirish ishlari boshlandi, deya xabar bermoqda boshqarma matbuot xizmati.
Qayd etilishicha, Jizzax, Qashqadaryo va Sirdaryo viloyatlarida avtomobil haydovchilari tomonidan avtomobildan foydalanish qoidalari buzilgani oqibatida gaz balloni jihozlari portlashi bilan bog‘liq holatlar texnik reglament talablariga rioya qilinishing ustidan nazorat kuchaytirilgan.
Toshkent shahar IIBB Yo‘l harakati xavfsizligi boshqarmasi rahbariyati tomonidan 4-iyun kuni mazkur yo‘nalish bo‘yicha O‘zbekiston Vazirlar Mahkamasining 2015-yil 11-noyabrdagi “Siqilgan tabiiy gazda, suyultirilgan neft gazida yoki dizel va gazsimon yoqilg‘i aralashmasida ishlaydigan transport vositalarining xavfsizligi to‘g‘risida umumiy texnik reglamentni tasdiqlash haqida”gi 326-sonli qarori, 2017-yil 11-oktabrdagi “Avtomobillarni gaz bilan to‘ldirish kompressor stansiyalari tarmog‘ini rivojlantirish va avtotransport vositalarini siqilgan tabiiy gazga bosqichli o‘tkazish hamda ularda gaz ballon asbob-uskunalarini xavfsiz ishlatishni ta’minlash qo‘shimcha chora-tadbirlari to‘g‘risida”gi 815-sonli qarori va 2012-yil 4-iyuldagi “Avtotransport vositalari konstruksiyasining foydalanish shartlari bo‘yicha xavfsizligi to‘g‘risida umumiy texnik reglamentni tasdiqlash haqida”gi 191-sonli qarori bilan tasdiqlangan Ichki ishlar vazirligining 2021-yil 15-may kunidagi 24/3-7331-sonli ko‘rsatmasiga asoslangan maxsus tadbir uyushtirilgan.
Toshkentning avtomobillarga gaz to‘ldirish stansiyalarida o‘tkazilgan tekshiruvlar davomida bir qator qoidabuzarliklar qayd etilgan. Jumladan, avtomobillarga gaz to‘ldirish stansiyalari xodimlari belgilangan texnik reglament talablariga rioya qilmasliklari, o‘rnatilgan gaz balloni jihozi dalolatnomasining muddati o‘tganligini tekshirish ishlari (opressovka) o‘tkazilmasligi aniqlangan.
Ma’lum qilinishicha, ushbu omil siqilgan tabiiy gazning konsentratsiyasining ma’lum darajadan oshish xavfini tug‘dirib, keyinchalik portlashga sabab bo‘lishi mumkin.
Transport vositalarida o‘rnatilgan gaz ballonlari davlat standarti talablariga muvofiq emasligiga qaramasdan, ular hatto me’yordan oshiq darajada gaz bilan to‘ldirilayotgani aniqlangan.
Oqibatda gaz ballonidagi bosim belgilangan 200 MPa me’yoridan oshmoqda. Tekshiruvlar davomida huquq-tartibot idoralari xodimlari bunday qoidabuzarliklar bilan 20 ga yaqin avtomashinalarni aniqlagan.
Avvalroq Qashqadaryoda harakatlanayotgan Nexia’ning gaz balloni portlashi oqibati ikki kishi halok bo‘lgani, Farg‘onadagi gaz “zapravka”da “Jiguli” portlagani, Sirdaryoda harakatlanayotgan Lacetti’ning gaz balloni portlashi oqibatida ikki kishi halok bo‘lgani hamda Samarqandda metan “zapravka”da turgan Nexia’ning gaz balloni portlab ketgani haqida xabar berilgandi.
Izoh (0)