Тошкентда ЙХҲББ ходимлари томонидан газ баллони ўрнатилган транспорт воситаларини текшириш ишлари бошланди, дея хабар бермоқда бошқарма матбуот хизмати.
Қайд этилишича, Жиззах, Қашқадарё ва Сирдарё вилоятларида автомобиль ҳайдовчилари томонидан автомобилдан фойдаланиш қоидалари бузилгани оқибатида газ баллони жиҳозлари портлаши билан боғлиқ ҳолатлар техник регламент талабларига риоя қилинишинг устидан назорат кучайтирилган.
Тошкент шаҳар ИИББ Йўл ҳаракати хавфсизлиги бошқармаси раҳбарияти томонидан 4 июнь куни мазкур йўналиш бўйича Ўзбекистон Вазирлар Маҳкамасининг 2015 йил 11 ноябрдаги «Сиқилган табиий газда, суюлтирилган нефть газида ёки дизель ва газсимон ёқилғи аралашмасида ишлайдиган транспорт воситаларининг хавфсизлиги тўғрисида умумий техник регламентни тасдиқлаш ҳақида»ги 326-сонли қарори, 2017 йил 11 октябрдаги «Автомобильларни газ билан тўлдириш компрессор станциялари тармоғини ривожлантириш ва автотранспорт воситаларини сиқилган табиий газга босқичли ўтказиш ҳамда уларда газ баллон асбоб-ускуналарини хавфсиз ишлатишни таъминлаш қўшимча чора-тадбирлари тўғрисида»ги 815-сонли қарори ва 2012 йил 4 июлдаги «Автотранспорт воситалари конструкциясининг фойдаланиш шартлари бўйича хавфсизлиги тўғрисида умумий техник регламентни тасдиқлаш ҳақида»ги 191-сонли қарори билан тасдиқланган Ички ишлар вазирлигининг 2021 йил 15 май кунидаги 24/3-7331-сонли кўрсатмасига асосланган махсус тадбир уюштирилган.
Тошкентнинг автомобилларга газ тўлдириш станцияларида ўтказилган текширувлар давомида бир қатор қоидабузарликлар қайд этилган. Жумладан, автомобилларга газ тўлдириш станциялари ходимлари белгиланган техник регламент талабларига риоя қилмасликлари, ўрнатилган газ баллони жиҳози далолатномасининг муддати ўтганлигини текшириш ишлари (опрессовка) ўтказилмаслиги аниқланган.
Маълум қилинишича, ушбу омил сиқилган табиий газнинг концентрациясининг маълум даражадан ошиш хавфини туғдириб, кейинчалик портлашга сабаб бўлиши мумкин.
Транспорт воситаларида ўрнатилган газ баллонлари давлат стандарти талабларига мувофиқ эмаслигига қарамасдан, улар ҳатто меъёрдан ошиқ даражада газ билан тўлдирилаётгани аниқланган.
Оқибатда газ баллонидаги босим белгиланган 200 МПа меъёридан ошмоқда. Текширувлар давомида ҳуқуқ-тартибот идоралари ходимлари бундай қоидабузарликлар билан 20 га яқин автомашиналарни аниқлаган.
Аввалроқ Қашқадарёда ҳаракатланаётган Nexia’нинг газ баллони портлаши оқибати икки киши ҳалок бўлгани, Фарғонадаги газ «заправка»да «Жигули» портлагани, Сирдарёда ҳаракатланаётган Lacetti’нинг газ баллони портлаши оқибатида икки киши ҳалок бўлгани ҳамда Самарқандда метан «заправка»да турган Nexia’нинг газ баллони портлаб кетгани ҳақида хабар берилганди.
Изоҳ (0)