Yevropa tiklanish va taraqqiyot banki Namangan viloyatida ichimlik suvi ta’minotini yaxshilashga 70 million dollar ajratadi, deb xabar bermoqda “Podrobno.uz”.
“Namangan suv ta’minoti” va hududiy suv ta’minoti korxonasiga 70 million dollargacha miqdorda suveren kredit beriladi. Ushbu mablag‘ hududdagi yettita qishloq aholi punkti (Chortoq, Chust, Jumasho‘y, Qizil Ravot, Pop, Toshbuloq va Uyg‘ur)ga xizmat ko‘rsatadigan suv olish inshootlari, tarqatish stansiyalari va tarmoqlari, magistrallari va suv tozalash inshootlarini qurish va qayta tiklashga, shuningdek, Chust va Jo‘masho‘y qishloqlarida tozalash inshootlari, kanalizatsiya nasos stansiyalari va tarmoqlarini qurish uchun sarflanadi.
Suv ta’minotini yaxshilash ishlari O‘zbekiston hukumatining 14 million dollar miqdoridagi hissasi bilan birga moliyalashtiriladi.
Investitsiyalar 115 mingga yaqin yangi foydalanuvchilarni suv ta’minoti tarmoqlariga ulash imkonini beradi. Yangi infratuzilma tufayli suv yo‘qotilishi yiliga 0,6 million kubometrga kamayadi.
Natijada Namangan viloyatining Chust, Namangan va Pop tumanlarida yashovchi 170 mingdan ortiq aholi doimiy toza ichimlik suvidan foydalanish imkoniga ega bo‘ladi.
Eslatib o‘tamiz, YeTTB Namanganda ichimlik suvi ta’minotini yaxshilashga mablag‘ ajratishi haqida 2020-yilning noyabrida ma’lum bo‘lgandi. Bugungi kunga kelib YeTTB O‘zbekiston iqtisodiyotiga 97 loyiha doirasida 2,4 milliard yevrodan ortiq mablag‘ kiritgan.
Izoh (0)