Jinoyat ishlari bo‘yicha Mirzo Ulug‘bek tuman sudida 1-iyun kuni tumanning “Chimyon” mahallasi Qorasuv kanalining bo‘yidagi o‘rindiqni sindirgan fuqaro bo‘yicha ochiq sud majlisi o‘tkazildi. Bu haqda “Milliy tiklanish” partiyasining Xalq deputatlari Mirzo Ulug‘bek tuman kengashi deputati Jahongir Ziyoyev o‘zining Telegram kanalida ma’lum qildi.
Ma’lum qilinishicha, aybdor sudda o‘z aybini tan olib, kechirim so‘ragan. Sud oilaviy ahvoli og‘irligini ma’lum qilgan aybdorga BHMning 2 baravari (490 ming so‘m) miqdorida jarima, shuningdek, 3 sutka muddatga ma’muriy qamoq jazosi tayinlagan.
“Odamlarga, davlatga yaxshilik qilish qo‘limizdan kelmas ekan, yomonlik qilmaylik. Xullas, loqaydlar, umuman, barchamiz o‘zgarishimiz kerak. Aks holda jamiyatimiz yaxshi tomonga o‘zgarmaydi”, — deb yozadi deputat.
Izoh (0)