“O‘zcharmsanoat” uyushmasi hamda Buxoro muhandislik texnologiya instituti bilan hamkorlikda “Yoshlarni qo‘llab-quvvatlash va aholi salomatligini mustahkamlash yili” davlat dasturida belgilangan vazifalarni amalga oshirish, ilm fan va ishlab chiqarish integratsiyasini yanada rivojlantirish maqsadida, Buxoro shahrida joriy yilning 1—2-iyun kunlari “Yangi O‘zbekiston yoshlari” shiori ostida “Poyabzal, charm-attorlik, charm kiyim va aksessuarlar-2021” ko‘rik tanlovi tashkil etildi.
Tanlovdan ko‘zlangan asosiy maqsad ilm-fan va ishlab chiqarishni bir-biri bilan bog‘lash, ta’lim muassasalari va korxonalar o‘rtasida kooperatsiya aloqalarini o‘rnatish, iqtidorli, yangicha fikrlaydigan va salohiyatli yoshlarni aniqlash orqali korxonalarning malakali mutaxassislarga bo‘lgan talabini qondirish va yoshlarning yangi ishlanmalarini ishlab chiqarishni joriy qilish hisoblanadi.
Charm-poyabzal sohasidagi moda olamining so‘nggi yangiliklari, xalqaro podium va sohaning zamonaviy tendensiyalarini o‘zida jamlagan tanlovda sohaning charm-poyabzal va mo‘ynachilik korxonalari, Buxoro, Toshkent, Namanganda joylashgan oliy ta’lim muassasalarning 50 dan ortiq yosh dizaynerlari yangi kolleksiyalari bilan ishtirok etdi.
Yangi ilhom va ko‘p qirrali ijodiy ishlanmalar namoyishiga aylangan tanlovda har bir yigit-qiz o‘ziga xos poyabzallar, charm-attorlik buyumlari, qorako‘l mahsulotlari, dekorativ dizayndagi buyumlarni soha professionallariga va ishlab chiqaruvchi korxonalar e’tiboriga taqdim etdi.
Tanlov ishtirokchilari 10 ta:
- eng yaxshi erkaklar poyabzali dizayni
- eng yaxshi ayollar poyabzali dizayni
- eng yaxshi bolalar poyabzali dizayni
- eng yaxshi sport poyabzali dizayni
- eng yaxshi charm-attorlik maxsulotlari dizayni
- eng yaxshi charmdan tayyorlangan ayollar kiyimi dizayni
- eng yaxshi charmdan tayyorlangan erkaklar kiyimi dizayni
- eng yaxshi qorako‘ldan tayyorlangan kiyimlar dizayni
- eng yaxshi bosh kiyim dizayni
- eng yaxshi dekorativ bezak dizayni yo‘nalishida o‘z iste’dod va iqtidorlarini sinovdan o‘tkazdi.
Ikki kun davomida bo‘lib o‘tgan tanlovda, 50 dan ortiq kolleksiyada200 ga yaqin ijodiy ishlar namoyish qilindi. Ular kolleksiya mavzusining originalligi va yangiligi, estetik yondashuv, salomatlikka ta’siri kabi 8 ta me’zonda baholandi. Eng yaxshilari esa mutlaq g‘oliblikni qo‘lga kiritdi. “O‘zcharmsanoat” uyushmasi tomonidan tanlovning birinchi o‘rin, “gran-pri” sohiblariga diplom hamda planshetlar esdalik sovg‘alari sifatida taqdim etildi.
Eng muhimi, tanlovda ishtirok etib, munosib o‘rinlarni qo‘lga kiritgan yosh dizaynerlarning ijodiy ishlanmalari soha korxonalarida hayotga joriy qilinadi. Bu esa iqtidorli yigit-qizlarni o‘z ustida yanada ko‘proq ishlashiga va yangi to‘plamlar bilan xalqimizni mamnun qilishga chorlaydi.
Ushbu tadbir ham charm poyabzal sohasida eng iqtidorli, yangicha fikrlaydigan va salohiyatli yoshlarni aniqlash va ularni imkoniyatlaridan keng foydalanish bo‘yicha muhim bir voqelikka aylandi.
“O‘zcharmsanoat” uyushmasi har doim yangilikka intiluvchan va faol yoshlarni doimiy ravishda, kerak bo‘lsa ham moddiy, ham ma’naviy jihatdan qo‘llab quvvatlashga tayyor.
Reklama huquqi asosida.
Izoh (0)