Biznes-ombudsman 28-may kuni Toshkent shahrida reklama bannerlari buzilishi holati bo‘yicha dastlabki o‘rganish natijalarini e’lon qilgandi. Unda reklama konstruksiyalarining demontaji Xalq deputatlari Toshkent shahar kengashining 2021-yil 27-martdagi 323/37-6-sonli “Toshkent shahrida tashqi reklama sohasidagi faoliyatni tartibga solish to‘g‘risida”gi qarori asosida amalga oshirilayotgani ma’lum qilingan. Tadbirkorlik subyektlarining huquqlari va qonuniy manfaatlarini himoya qilish bo‘yicha vakilning bildirishicha, ushbu axborot noto‘g‘ri talqin etilib, yuqoridagi qaror “reklama bannerlarini buzish bo‘yicha qaror” deya e’tirof etilmoqda.
Dastlabki o‘rganishlarga ko‘ra, poytaxt hududidagi reklama konstruksiyalarini demontaj qilishga Xalq deputatlari Toshkent shahar kengashining yuqoridagi qarori ayrim tadbirkorlar tomonidan huquqiy asos sifatida keltirilmoqda, biroq ushbu qaror biznes-ombudsman tomonidan o‘rganib chiqilganida qarorda reklama konstruksiyalarini demontaj qilish bo‘yicha talab yoki topshiriqlar belgilanmagani aniqlangan.
Unda poytaxt hududida reklama konstruksiyalarining buzilishi masalasiga taalluqli norma aks etmagan.
Qarorda reklama obyektlarini o‘rnatish va reklama kostruksiyalaridan foydalanishni tartibga solish masalalari, shu jumladan, tadbirkorlar bilan shartnomalar tuzish tizimini zamonaviy axborot-kommunikatsiya texnologiyalari yordamida raqamlashtirishga o‘tkazish chora-tadbirlari nazarda tutilgan.
Biroq shunga qaramasdan, 2021-yilning aprel oyida Toshkent shahrining Mirzo Ulug‘bek, Shayxontohur, Chilonzor, Yunusobod va Olmazor tumanlarida tadbirkorlarga tegishli reklama konstruksiyalari ayrim shaxslar tomonidan ushbu qarorning mazmun-mohiyatiga zid ravishda demontaj qilingan.
Biznes-ombudsman ommaga berilayotgan axborotlarni to‘g‘ri va xolisona yetkazish maqsadida, uning rasmiy sahifalarida e’lon qilinayotgan axborotlarda tushunmovchiliklar yuzaga kelgan taqdirda matbuot xizmati bilan bog‘lanib, aniqlashtirishni so‘ragan.
Eslatib o‘tamiz, Toshkent shahrida reklama konstruksiyalarini ommaviy buzib tashlash ishlari 8-apreldan boshlab amalga oshirilmoqda. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. Tadbirkorlar hozirga qadar 700 dan ortiq bannerlarni olib tashlagan hukumatning harakatini noqonuniy deb aytmoqda, chunki bannerlar sud qarorisiz buzib tashlanmoqda.
Keyinchalik reklama sohasidagi tadbirkorlar ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab Prezident Shavkat Mirziyoyevga murojaat yo‘lladi.
Mavzuga doir:
Izoh (0)