Бизнес-омбудсман 28 май куни Тошкент шаҳрида реклама баннерлари бузилиши ҳолати бўйича дастлабки ўрганиш натижаларини эълон қилганди. Унда реклама конструкцияларининг демонтажи Халқ депутатлари Тошкент шаҳар кенгашининг 2021 йил 27 мартдаги 323/37-6-сонли «Тошкент шаҳрида ташқи реклама соҳасидаги фаолиятни тартибга солиш тўғрисида»ги қарори асосида амалга оширилаётгани маълум қилинган. Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилнинг билдиришича, ушбу ахборот нотўғри талқин этилиб, юқоридаги қарор «реклама баннерларини бузиш бўйича қарор» дея эътироф этилмоқда.
Дастлабки ўрганишларга кўра, пойтахт ҳудудидаги реклама конструкцияларини демонтаж қилишга Халқ депутатлари Тошкент шаҳар кенгашининг юқоридаги қарори айрим тадбиркорлар томонидан ҳуқуқий асос сифатида келтирилмоқда, бироқ ушбу қарор бизнес-омбудсман томонидан ўрганиб чиқилганида қарорда реклама конструкцияларини демонтаж қилиш бўйича талаб ёки топшириқлар белгиланмагани аниқланган.
Унда пойтахт ҳудудида реклама конструкцияларининг бузилиши масаласига тааллуқли норма акс этмаган.
Қарорда реклама объектларини ўрнатиш ва реклама коструксияларидан фойдаланишни тартибга солиш масалалари, шу жумладан, тадбиркорлар билан шартномалар тузиш тизимини замонавий ахборот-коммуникация технологиялари ёрдамида рақамлаштиришга ўтказиш чора-тадбирлари назарда тутилган.
Бироқ шунга қарамасдан, 2021 йилнинг апрель ойида Тошкент шаҳрининг Мирзо Улуғбек, Шайхонтоҳур, Чилонзор, Юнусобод ва Олмазор туманларида тадбиркорларга тегишли реклама конструкциялари айрим шахслар томонидан ушбу қарорнинг мазмун-моҳиятига зид равишда демонтаж қилинган.
Бизнес-омбудсман оммага берилаётган ахборотларни тўғри ва холисона етказиш мақсадида, унинг расмий саҳифаларида эълон қилинаётган ахборотларда тушунмовчиликлар юзага келган тақдирда матбуот хизмати билан боғланиб, аниқлаштиришни сўраган.
Эслатиб ўтамиз, Тошкент шаҳрида реклама конструкцияларини оммавий бузиб ташлаш ишлари 8 апрелдан бошлаб амалга оширилмоқда. Ташқи реклама объектларининг эгалари конструкциялар қонун бўйича ўрнатилгани, «снос» бўйича кўрсатма «юқоридан» бўлганини маълум қилган. Тадбиркорлар ҳозирга қадар 700 дан ортиқ баннерларни олиб ташлаган ҳукуматнинг ҳаракатини ноқонуний деб айтмоқда, чунки баннерлар суд қарорисиз бузиб ташланмоқда.
Кейинчалик реклама соҳасидаги тадбиркорлар ушбу вазиятни ҳал этишга чақирувчи бир нечта реклама баннерлари ўрнатиш орқали реклама конструкцияларининг ноқонуний бузилишини тўхтатишни сўраб Президент Шавкат Мирзиёевга мурожаат йўллади.
Изоҳ (0)