Qashqadaryoda unashtirilgan yigit-qizni qo‘lga olib, ularni qo‘yib yuborish evaziga pul so‘ragan IIB xodimlari ishdan olindi

Qashqadaryo viloyatining Koson tumanida unashtirilgan yigit-qizni mashinada o‘tirgan holatda qo‘lga olib, ularni qo‘yib yuborish evaziga salkam 5 million so‘m talab qilgan IIB xodimlari ishdan bo‘shatildi. Bu haqda viloyat IIB axborot xizmati xabar berdi.

Ma’lum bo‘lishicha, 2021-yilning 8-aprel kuni Koson tumanidagi “Do‘stlik” mahallasi hududida fuqaro G‘.A unashtirilgan qizi O.H bilan Сobalt avtomashinasida o‘zaro suhbatlashib o‘tirganda katta leytenant I.Fayzullayev va hamkasbi katta leytenant F.Astanov ularning yoniga kelib, “nega yotibsizlar, er-xotinmisizlar”, deya G‘.A.ning avtomashinasini asossiz va hech qanday hujjatlarsiz jarima maydoniga joylashtirgan. O.H.ni esa xulqi buzuq ayol sifatida ro‘yxatga olishni bildirib, dastlab tuman tibbiyot birlashmasidan tan jarohati bor yoki yo‘qligi haqida tibbiy ko‘rikdan o‘tkazib, so‘ngra tuman IIBga olib borgan.

Qashqadaryo viloyati IIB mas’ul xodimlari tomonidan I.Fayzullayev va F.Astanovlar sodir qilgan mazkur salbiy holat aniqlanib, ulardan fuqarolar G‘.A.va uning unashtirilgan qizi O.H.ni nima sababdan tuman IIBga olib kelib, ushlab o‘tirganligi so‘ralganda ular tomonidan hech qanday asoslantiruvchi hujjatlar taqdim etilmagan.

Holat yuzasidan mas’ul xodimlar tomonidan katta leytenant I.Fayzullayev va katta leytenant F.Astanovlardan tushuntirish xati olib bo‘lingandan so‘ng ular hujjatlarni rasmiylashtirishga harakat qilib, bildirgi yozib, ro‘yxatdan o‘tkazishga erishgani ma’lum bo‘lgan.

Mas’ul xodimlar tomonidan o‘tkazilgan xizmat tekshiruvi davomida I.Fayzullayev va F.Astanovlar fuqarolar G‘.A. va O.H.larning mazkur mahallada yashashi, ularning shaxsi va yashash manzili aniq bo‘lishiga qaramasdan, to‘rt soat davomida ushlab o‘tirgan bo‘lsa-da, ularga nisbatan hech qanday hujjat rasmiylashtirmasdan, fuqaro G‘.A.dan 4 million 900 ming so‘m miqdorda pul talab qilgani, uning yonida bo‘lgan Samsung rusumli qo‘l telefoni va 200 ming so‘m pullarini olib, avtomashinasini jarima maydonchasidan chiqarishga ruxsat berganligi aniqlangan.

Mazkur holat yuzasidan Koson tumani IIB mas’ul xodimlari tomonidan xizmat tekshiruvi o‘tkazilib, katta leytenant I.Fayzullayev va katta leytenant F.Astanovlar IIO safidan bo‘shatilgan va ularning harakatiga qonuniy baho berish uchun to‘plangan hujjatlar Koson tuman prokuraturasiga yuborilgan.