Қашқадарё вилоятининг Косон туманида унаштирилган йигит-қизни машинада ўтирган ҳолатда қўлга олиб, уларни қўйиб юбориш эвазига салкам 5 миллион сўм талаб қилган ИИБ ходимлари ишдан бўшатилди. Бу ҳақда вилоят ИИБ ахборот хизмати хабар берди.
Маълум бўлишича, 2021 йилнинг 8 апрель куни Косон туманидаги «Дўстлик» маҳалласи ҳудудида фуқаро Ғ.А унаштирилган қизи О.Ҳ билан Сobalt автомашинасида ўзаро суҳбатлашиб ўтирганда катта лейтенант И.Файзуллаев ва ҳамкасби катта лейтенант Ф.Астанов уларнинг ёнига келиб, «нега ётибсизлар, эр-хотинмисизлар», дея Ғ.А.нинг автомашинасини асоссиз ва ҳеч қандай ҳужжатларсиз жарима майдонига жойлаштирган. О.Ҳ.ни эса хулқи бузуқ аёл сифатида рўйхатга олишни билдириб, дастлаб туман тиббиёт бирлашмасидан тан жароҳати бор ёки йўқлиги ҳақида тиббий кўрикдан ўтказиб, сўнгра туман ИИБга олиб борган.Қашқадарё вилояти ИИБ масъул ходимлари томонидан И.Файзуллаев ва Ф.Астановлар содир қилган мазкур салбий ҳолат аниқланиб, улардан фуқаролар Ғ.А.ва унинг унаштирилган қизи О.Ҳ.ни нима сабабдан туман ИИБга олиб келиб, ушлаб ўтирганлиги сўралганда улар томонидан ҳеч қандай асослантирувчи ҳужжатлар тақдим этилмаган.
Ҳолат юзасидан масъул ходимлар томонидан катта лейтенант И.Файзуллаев ва катта лейтенант Ф.Астановлардан тушунтириш хати олиб бўлингандан сўнг улар ҳужжатларни расмийлаштиришга ҳаракат қилиб, билдирги ёзиб, рўйхатдан ўтказишга эришгани маълум бўлган.
Масъул ходимлар томонидан ўтказилган хизмат текшируви давомида И.Файзуллаев ва Ф.Астановлар фуқаролар Ғ.А. ва О.Ҳ.ларнинг мазкур маҳаллада яшаши, уларнинг шахси ва яшаш манзили аниқ бўлишига қарамасдан, тўрт соат давомида ушлаб ўтирган бўлса-да, уларга нисбатан ҳеч қандай ҳужжат расмийлаштирмасдан, фуқаро Ғ.А.дан 4 миллион 900 минг сўм миқдорда пул талаб қилгани, унинг ёнида бўлган Samsung русумли қўл телефони ва 200 минг сўм пулларини олиб, автомашинасини жарима майдончасидан чиқаришга рухсат берганлиги аниқланган.
Мазкур ҳолат юзасидан Косон тумани ИИБ масъул ходимлари томонидан хизмат текшируви ўтказилиб, катта лейтенант И.Файзуллаев ва катта лейтенант Ф.Астановлар ИИО сафидан бўшатилган ва уларнинг ҳаракатига қонуний баҳо бериш учун тўпланган ҳужжатлар Косон туман прокуратурасига юборилган.
Мавзуга доир:
Изоҳ (0)