Sirdaryoda haydovchining telefonini olib qo‘ygan YPX xodimi lavozimidan ozod etildi

Sirdaryo viloyatida haydovchi bilan kelib chiqqan kelishmovchilik vaqtida uning telefonni olib qo‘ygan YPX xodimi ishdan bo‘shatildi, deya xabar bermoqda YXHBB.

Ma’lum qilinishicha, 2020-yil 21-oktabr kuni ijtimoiy tarmoqlarda “Sirdaryoda haydovchi va GAI xodimi o‘rtasidagi kelishmovchilik videosi tarqaldi. Bunga ko‘ra, GAI xodimi haydovchining telefonini olib qo‘ygan. Sababi esa noma’lum” sarlavhali video tarqalgan.

Unga ko‘ra, Sirdaryo viloyati IIB YHXB YPX inspektori safdor B.Bobojonov 2020-yil 7-oktabr kuni soat 15:40 larda Sirdaryo tumani hududidan o‘tgan M-34 avtomobil yo‘lining 90-kilometrida xizmat olib borayotgan vaqtida tovush kuchaytirgich (sirena) moslamasini yoqib kelganlikda gumonlanib, Lacetti rusumli transport vositasini to‘xtatadi.

Shu payt haydovchi va YPX inspektori o‘rtasida kelishmovchilik kelib chiqib, holatga haydovchining yaqinlari ham aralashadi va shaxsiy uyali aloqa vositasi yordamida tasvirga oladi. Videoda safdor B.Bobojonov yigitlarning o‘zini tasvirga olishiga qarshilik qilib, uyali telefonlarini olib qo‘yganligi aks etgan.

O‘zbekiston IIV YHXBB axborot xizmatining ma’lum qilishicha, mazkur holat yuzasidan o‘tkazilgan xizmat tekshiruvida Vazirlar Mahkamasining 2018-yil 1-dekabrdagi 975-son qarori bilan tasdiqlangan “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi nizom hamda IIVning ayrim me’yoriy buyruq talablarini buzganligi uchun Sirdaryo viloyati IIB YHXB YPXO YPX inspektori B.Bobojonov egallab turgan lavozimidan ozod etilishi bo‘yicha xulosa qabul qilindi.

Avvalroq Ohangaronda to‘xtatilgan haydovchiga “masxarabozlik qilgan” YPX xodimi lavozimidan ozod qilingani hamda Navoiyda haydovchining soqol qo‘yganiga e’tiroz bildirgan YPX xodimi ustidan xizmat tekshiruvi boshlangani haqida xabar berilgandi.