O‘zbekistonda zo‘ravonlikdan jabr ko‘rgan 209 erkak Ayollarni reabilitatsiya qilish markazlariga murojaat qildi

O‘zbekistondagi Ayollarni reabilitatsiya qilish markazlariga zo‘ravonlikdan himoya so‘rab 209 nafar erkak murojaat qilgan. Bu haqda Mahalla va oilani qo‘llab-quvvatlash vazirligi boshqarma boshlig‘i Dilorom Qo‘ziyeva AOKAda o‘tkazilgan matbuot anjumanida ma’lum qildi.

Ma’lum qilinishicha, hozirgi kunga qadar reabilitatsiya markazlariga 4200 dan ortiq fuqaro murojaat qilgan. Ularning 3827 tasi ayol, 169 tasi bola, 209 nafari erkak. Murojaat qilganlarning 1347 tasi ruhiy, 845 tasi jismoniy, 23 tasi jinsiy, 394 tasi iqtisodiy, 1596 tasi boshqa masalalarda zo‘ravonlik holatlaridan shikoyat qilgan.

O‘zbekiston qonunchiligida zo‘ravonlikning 4 ta turi bor: jismoniy, jinsiy, ruhiy, iqtisodiy zo‘ravonlik. Lekin tahlillar oilaviy-maishiy zo‘ravonlik holatlari ham ko‘p uchrayotgani va bunga yetarlicha ta’rif berilmayotganini ko‘rsatmoqda.

Mahalla va oilani qo‘llab-quvvatlash vazirligi yuqori turuvchi organlarga 2019-yilda qabul qilingan “Xotin-qizlarni tazyiq va zo‘ravonlikdan himoya qilish to‘g‘risida”gi qonuniga tegishli o‘zgartirishlar kiritish borasida takliflarini kiritgan. Murojaatlar tahliliga ko‘ra,

• oilaviy zo‘ravonlik er-xotin o‘rtasida doimiy kelishmovchilik tufayli – 1889 ta holatda;
• uchinchi tomon aralashuvi tufayli zo‘ravonlik – 457 ta holatda;
• ota-ona va farzand o‘rtasida zo‘ravonlik – 101 ta holatda aniqlangan.